Kien l-ewwel jum tal-ġimgħa, filgħodu kmieni kif kien għadu d-dlam, u Marija ta’ Magdala ġiet ħdejn il-qabar u rat il-blata mneħħija mill-qabar. Għalhekk telqet tiġri għand Xmun Pietru u għand id-dixxiplu l-ieħor li kien iħobb Ġesù, u qaltilhom: “Qalgħu lill-Mulej mill-qabar, u ma nafux fejn qegħduh!”.

Pietru u d-dixxiplu l-ieħor ħarġu u ġew ħdejn il-qabar. It-tnejn ġrew flimkien, imma d-dixxiplu l-ieħor ħaffef aktar minn Pietru u laħaq qablu ħdejn il-qabar. Tbaxxa, u ra l-faxex tal-għażel imqiegħda hemm, iżda ma daħalx. Imbagħad wasal warajh Xmun Pietru, daħal fil-qabar, u ra l-faxex tal-għażel imqiegħda hemm, u l-maktur li kien madwar rasu; dan ma kienx mal-faxex, imma mitwi u mqiegħed f’post għalih. Imbagħad id-dixxiplu l-ieħor, li kien wasal l-ewwel ħdejn il-qabar, daħal hu wkoll, ra, u emmen.

Sa dakinhar kienu għadhom ma fehmux l-Iskrittura li tgħid li kellu jqum mill-imwiet. Ġw 20:1-9

i. Kien l-ewwel jum tal-ġimgħa, filgħodu kmieni kif kien għadu d-dlam, u Marija ta’ Magdala ġiet ħdejn il-qabar u rat il-blata mneħħija mill-qabar.

Fl-ewwel jum
meta Alla qal “Ħa jkun id-dawl” u
“fired id-dawl mid-dlam” (Ġenesi 1, 2-3)

Marija ta’ Magdala
kif kien għadu d-dlam
tilmaħ il-qabar miftuħ:

hemm ħolqien ġdid, id-dawl għeleb lid-dlam,
u f’qalbha jiċċaqlaq xi ħaġa
li l-moħħ għadu ‘l bogħod biex jaħkem.

Irrifletti:

• Fejn hemm dawl ġdid ifeġġ f’ħajtek?

ii. Għalhekk telqet tiġri għand Xmun Pietru u għand id-dixxiplu l-ieħor li kien iħobb Ġesù, u qaltilhom: “Qalgħu lill-Mulej mill-qabar, u ma nafux fejn qegħduh!”.

“Qalgħu lill-Mulej mill-qabar”!
Tinftiehem bħala serqa
il-fedeltà tal-Missier.

“U ma nafux fejn qegħduh!”
U lanqas se nsiru nafu
U lanqas hemm bżonn insiru nafu.

Issa l-Mulej imexxi l-istorja
mhux inqiegħduh fejn jidhrilna aħna!

Però ibqa’ fittxu:
kull darba ħallih jieħdok lil hinn mill-qabar.

Irrifletti:

• Ġesù il-Mulej tiegħek? Tħallih imexxik?

iii. Imbagħad wasal warajh Xmun Pietru, daħal fil-qabar, u ra l-faxex tal-għażel imqiegħda hemm, u l-maktur li kien madwar rasu; dan ma kienx mal-faxex, imma mitwi u mqiegħed f’post għalih. Imbagħad id-dixxiplu l-ieħor, li kien wasal l-ewwel ħdejn il-qabar, daħal hu wkoll, ra, u emmen.

Għall-ewwel naraw il-fatti (v. 1: blepo - βλέπω):
jistgħu jidhru koroh jew newtrali!

Fit-tieni mument, ma’ Pietru, nibdew nirriflettu (v. 6: theoreo - θεωρέω):
hemm ċertu ordni, donnu hemm xi ħaġa aktar!

U fl-aħħar, mad-dixxiplu l-maħbub, naraw fil-fond (v. 8: horao - ὁράω):
U nemmnu! U l-perspettiva tal-ħajja tinbidel ta’ taħt fuq!

Jekk dak li għamel il-ġid, dak li qatluh, huwa ħaj, irxuxtat,
mela fuq ħajtu jagħmel sens li nfassal tiegħi.

Irrifletti:

• Ieqaf ftit bil-memorja tax-xemx tielgħa? Ħalli lil Ġesù Rxoxt idawwal lil ħajtek.

3. Missierna

Dawn ir-riflessjonijiet u aktar tista’ ssibhom fuq il-Paġna ta’ Facebook tal-Knisja ta’ Sant’ Anna taż-Żebbiegħ, l-Imġarr.

Inħeġġuk tagħfas Follow.

F’dak iż-żmien, ħut Lazzru bagħtu jgħidu lil Ġesù: “Mulej, ara, ħabibek marid”. Meta sama’ l-aħbar Ġesù qal: “Din m’hijiex marda tal-mewt, iżda hi għall-glorja ta’ Alla, biex biha tingħata glorja lill-Iben ta’ Alla”. Ġesù kien iħobbhom lil Marta u lil oħtha u lil Lazzru. Meta sama’ li dan marad, baqa’ jumejn oħra fejn kien, u mbagħad qal lid-dixxipli: “Ejjew nerġgħu mmorru l-Lhudija”.

Meta wasal, Ġesù sab li Lazzru kien ġa ilu erbat ijiem fil-qabar. Kif, mela, semgħet li kien ġej Ġesù, Marta ħarġet tilqgħu, iżda Marija baqgħet id-dar. Marta qalet lil Ġesù: “Mulej, kieku kont hawn, ħija ma kienx imut. Imma wkoll issa, jiena naf li kull ma int titlob lil Alla, Alla jagħtihulek”. Ġesù qalilha: “Ħuk jerġa’ jqum!”. Qaltlu Marta: “Jiena naf li jerġa’ jqum, fil-qawmien mill-imwiet fl-aħħar jum”. Qalilha Ġesù: “Jiena hu l-qawmien u l-ħajja. Kull min jemmen fija, ukoll jekk imut, jgħix; u kull min jgħix u jemmen ija, dan ma jmut qatt. Temmnu inti dan?”. Weġbitu: “Iva Mulej, jiena nemmen li inti l-Messija, l-Iben ta’ Alla, dak li ġie fid-dinja”.

Ġesù ħass ruħu mqanqal u tħawwad ħafna. “Fejn qegħedtuh?” staqsiehom. Huma weġbuh: “Mulej, ejja u ara”. U Ġesù beka. Għalhekk il-Lhud qalu: “Ara kemm kien iħobbu!”. Iżda xi wħud minnhom qalu: “Ma setax dan il-bniedem, li fetaħ għajnejn l-agħma, jagħmel ukoll li dan ma jmutx?”.

Ġesù ħass ruħu mqanqal għal darb’oħra u resaq lejn il-qabar. Dan kien għar magħluq bi blata fuqu. Ġesù qal: “Neħħu l-blata”. Marta, oħt il-mejjet, qaltlu: “Mulej issa beda jrejjaħ; ġa ilu erbat ijiem mejjet”. Qalilha Ġesù: “Ma għedtlekx li jekk inti temmen, tara l-glorja ta’ Alla?”. Imbagħad neħħew il-blata. Ġesù rafa’ għajnejh ’il fuq u qal: “Missier, irroddlok ħajr li smajtni. Kont naf li inti dejjem tismagħni, imma għidt dan minħabba n-nies li hawn madwari, biex huma jemmnu li inti bgħattni”. Kif qal hekk, għajjat b’leħen għoli: “Lazzru, oħroġ!”. U dak li kien mejjet ħareġ, b’idejh u riġlejh infaxxati u b’maktur ma’ wiċċu. Ġesù qalilhom: “Ħollulu l-faxex u ħalluh imur”.

Ħafna mil-Lhud, li kienu ġew għand Marija u raw dak li għamel Ġesù, emmnu fih. Ġw 11, 3-7.17.20-27.33b-45

i. Ġesù ħass ruħu mqanqal għal darb’oħra u resaq lejn il-qabar. Dan kien għar magħluq bi blata fuqu. Ġesù qal: “Neħħu l-blata”. Marta, oħt il-mejjet, qaltlu: “Mulej issa beda jrejjaħ; ġa ilu erbat ijiem mejjet”. Qalilha Ġesù: “Ma għedtlekx li jekk inti temmen, tara l-glorja ta’ Alla?”. Imbagħad neħħew il-blata.

Ġesù mqanqal għal darb’oħra
quddiem ħabibu Lazzru mejjet
quddiem il-kruha tal-mewt
quddiem dak li jidher midfun għal dejjem.

Ġesù jqanqal
jersaq qrib ir-realtà iebsa
iċaqlaq iċ-ċertezzi li jgħidulek “ma hemmx x’tagħmel aktar”
jiftaħ il-fidi għas-sorpriżi t’Alla.

Irrifletti:

• Ma liema ġebla tissielet?

ii. Ġesù rafa’ għajnejh ’il fuq u qal: “Missier, irroddlok ħajr li smajtni. Kont naf li inti dejjem tismagħni, imma għidt dan minħabba n-nies li hawn madwari, biex huma jemmnu li inti bgħattni”. Kif qal hekk, għajjat b’leħen għoli: “Lazzru, oħroġ!”.

Saqajh mal-art,
quddiem il-qabar, qrib qlub miksura

għajnejh ‘il fuq
jara lil hinn, bi gratitudni lejn il-Missier li jidher assenti

b’vuċi qawwija
li tkellem l-impossibbli, lil min diġà mejjet: “Lazzru oħroġ!”

L-ebda ġebla, disfatta, falliment jew ħtija ma jżommu lil Alla lura.

Irrifletti:

• Xi jfissru għalik dawn il-kliem indirizzati lilek? “Lazzru , oħroġ!”

iii. U dak li kien mejjet ħareġ, b’idejh u riġlejh infaxxati u b’maktur ma’ wiċċu. Ġesù qalilhom: “Ħollulu l-faxex u ħalluh imur”.

Lil dawk b’qalbhom imnikkta
għat-telfa u l-firda
jissorprendihom mill-ġdid:
“issa tifgawhx” – il-ħajja tikber fil-libertà -
“Hollulu l-faxedx u ħalluh imur”.

Irrifletti:

• Xi tfisser għalik li bl-imħabba tiegħek tkabbar il-libertà f’ħaddieħor?

3. Missierna

Dawn ir-riflessjonijiet u aktar tista’ ssibhom fuq il-Paġna ta’ Facebook tal-Knisja ta’ Sant’ Anna taż-Żebbiegħ, l-Imġarr.

Inħeġġuk tagħfas Follow.

F’dak iż-żmien, kif kien għaddej, Ġesù lemaħ raġel agħma minn twelidu; beżaq fl-art, għamel minnu qisu tajn, u dilek bih għajnejn ir-raġel agħma u qallu: “Mur inħasel fil-menqgħa ta’ Silwam”. Din tfisser “il-Mibgħut”. Mela dak mar, inħasel u ġie jara. Il-ġirien u dawk li s-soltu kienu jarawh, għax hu kien tallab, qalu: “Dan mhuwiex dak li kien joqgħod bilqiegħda jittallab?”. Xi wħud qalu: “Iva, hu”. Oħrajn qalu: “Le, imma jixbhu”. Iżda hu qalilhom: “Jiena hu”.

Lil dan il-bniedem li fl-imgħoddi kien agħma ħaduh għand il-Fariżej. Issa dakinhar li Ġesù għamel it-tajn u fetaħ għajnejn l-agħma nzerta kien is-Sibt. Il-Fariżej ukoll staqsew mill-ġdid lill-agħma kif sar jara. U hu qalilhom: “Qegħedli ftit tajn fuq għajnejja, mort ninħasel, u issa qiegħed nara”. Xi wħud mill-Fariżej qalu: “Dan il-bniedem mhuwiex ġej mingħand Alla, għax ma jħarisx is-Sibt”. Iżda oħrajn qalu: “Kif jista’ wieħed midneb jagħmel sinjali bħal dawn?”. U ma qablux bejniethom.

U reġgħu qalu lill-agħma: “Int x’jidhirlek minnu, issa li fetaħlek għajnejk?”. Qalilhom: “Dak profeta”. Imbagħad qabżu u qalulu: “Int se tgħallem lilna, int li twelidt dnubiet waħdek”. U keċċewh ’il barra.

Ġesù sama’ li keċċewh ’il barra; sabu u qallu: “Temmen inti f’Bin il-bniedem?”. Dak wieġeb u qallu: “Min hu, Mulej, biex nemmen fih?”. Qallu Ġesù: “Mhux biss rajtu, imma huwa dak stess li qiegħed ikellmek”. Qallu: “Nemmen, Mulej!”. U nxteħet għarkupptejh quddiemu. Ġw 9:1,6-9,13-17,34-38

i. Kif kien għaddej, Ġesù lemaħ raġel agħma minn twelidu; beżaq fl-art, għamel minnu qisu tajn, u dilek bih għajnejn ir-raġel agħma u qallu: “Mur inħasel fil-menqgħa ta’ Silwam”. Din tfisser “il-Mibgħut”. Mela dak mar, inħasel u ġie jara.

Faċli toqgħod tiddiskuti ta’ min hu t-tort,
f’min se twaħħal,
x’ġudizzju se tagħti:
l-agħma jibqa’ ma jarax.

L-agħma jibda jara
wara li Ġesù lemħu, iltaqa’ miegħu
wara li Ġesù ħa lilu u r-realtà bis-serjetà – diliklu għajnjeh bit-tajn -
wara li stiednu jara kollox mill-perspettiva t’Alla –
jinħasel fil-Mibgħut.

Irrifletti:

• Fejn mistieden toqrob lejn it-tbatija tal-oħrajn flok tiġġudikaha mill-bogħod?

ii. Il-Fariżej ukoll staqsew mill-ġdid lill-agħma kif sar jara. U hu qalilhom: “Qegħedli ftit tajn fuq għajnejja, mort ninħasel, u issa qiegħed nara”. Xi wħud mill-Fariżej qalu: “Dan il-bniedem mhuwiex ġej mingħand Alla, għax ma jħarisx is-Sibt”. Iżda oħrajn qalu: “Kif jista’ wieħed midneb jagħmel sinjali bħal dawn?”. U ma qablux bejniethom.

U reġgħu qalu lill-agħma: “Int x’jidhirlek minnu, issa li fetaħlek għajnejk?”. Qalilhom: “Dak profeta”. Imbagħad qabżu u qalulu: “Int se tgħallem lilna, int li twelidt dnubiet waħdek”. U keċċewh ’il barra.

Kif inhi li minn persuni li jsaqsu, li jfittxu,
issa waslu biex ikeċċuh ‘il barra.

Kif inhi li qegħdin nużaw ir-reliġjon
biex noħolqu gwerra, biex neliminaw l-innoċenti?

Kif inhi li filli qed jesploraw perspettiva differenti (ma qablux bejniethom)
u filli jaqblu kollha fuq l-aktar veduti estremisti?

Irrifletti:

• Fejn qed teħel ma’ idea li għandek u ma tinfetaħx għal perspettiva ġdida? X’inhi l-istedina t’Alla f’ħajtek bħalissa? Min qed ibati meta tingħalaq għaliha?

iii. Ġesù sama’ li keċċewh ’il barra; sabu u qallu: “Temmen inti f’Bin il-bniedem?”. Dak wieġeb u qallu: “Min hu, Mulej, biex nemmen fih?”. Qallu Ġesù: “Mhux biss rajtu, imma huwa dak stess li qiegħed ikellmek”. Qallu: “Nemmen, Mulej!”. U nxteħet għarkupptejh quddiemu.

L-ideat f’moħħi,
jidhru kemm jidhru tajbin,
faċli jsiru għamad biex ma narax ir-realtà,
faċli jsiru arma li joqtlu r-relazzjoni.

Temmen inti f’Bin il-bniedem?
Hemm relazzjoni bażika ta’ fiduċja f’ħajtek?
Dak li miftuħ totalment għall-Etern, għall-Missier, jista’ jiftaħlek perspettiva ġdida?
Dak li miftuħ kontinwament għar-realtà – f’kompassjoni għal min iġorr it-tbatija –
jista’ jiftaħlek għajnejk għal dawk li aħna aktar komdi nħalluhom fl-agħma?

Irrifletti:

• Ieqaf ftit mal-kliem “Nemmen, Mulej!”. Agħżel ġest biex tesprimi l-fiduċja f’Ġesù.

3. Missierna

Dawn ir-riflessjonijiet u aktar tista’ ssibhom fuq il-Paġna ta’ Facebook tal-Knisja ta’ Sant’ Anna taż-Żebbiegħ, l-Imġarr.

Inħeġġuk tagħfas Follow.

Niftħu qalbna għall-Kelma t’Alla

F’dak iż-żmien, Ġesù ġie f’belt tas-Samarija, jisimha Sikar, qrib il-biċċa art li Ġakobb kien ta lil ibnu Ġużeppi, fejn kien hemm ukoll il-bir ta’ Ġakobb. Kien għall-ħabta tas-sitt siegħa, u Ġesù, għajjien kif kien mill-mixi, qagħad bilqiegħda ħdejn il-bir.

U ġiet mara mis-Samarija timla l-ilma. Ġesù qalilha: “Agħtini nixrob”. Id-dixxipli tiegħu kienu marru l-belt jixtru x’jieklu. Il-mara mis-Samarija qaltlu: “Kif! Inti Lhudi u titlob lili, Samaritana, biex nagħtik tixrob?”. Qaltlu hekk għax il-Lhud ma jitħalltux mas-Samaritani. Ġesù weġibha: “Kieku kont taf id-don ta’ Alla u min hu dak li qiegħed jgħidlek: ‘Agħtini nixrob’, kieku int kont titolbu, u hu kien jagħtik ilma ħaj”. Qaltlu l-mara: “Sinjur, mnejn se ġġib l-ilma ħaj jekk anqas biex timla ma għandek u l-bir huwa fond? Jaqaw int aqwa minn missierna Ġakobb li tana dan il-bir, li minnu xorob hu u wliedu u l-imrieħel tiegħu?”. Weġibha Ġesù: “Kull min jixrob minn dan l-ilma jerġa’ jagħtih l-għatx; imma min jixrob mill-ilma li nagħtih jien qatt iżjed ma jkun bil-għatx. L-ilma li nagħtih jien isir fih għajn tal-ilma li jwassal sal-ħajja ta’ dejjem”. Qaltlu l-mara: “Agħtini dan l-ilma, Sinjur, biex ma jaqbadnix l-għatx, u anqas ma noqgħod ġejja u sejra hawn nimla l-ilma. Int profeta, Sinjur, milli qiegħda nara. Missirijietna kienu jaduraw lil Alla fuq din il-muntanja; imma intom tgħidu li l-post fejn wieħed għandu jadura lil Alla jinsab f’Ġerusalemm”. Qalilha Ġesù: “Emminni, mara, jiġi żmien meta mhux fuq din il-muntanja taduraw lill-Missier, anqas f’Ġerusalemm. Intom taduraw lil dak li ma tafux; aħna naduraw lil dak li nafu, għax is-salvazzjoni ġejja mil-Lhud. Imma tiġi siegħa, anzi issa hi, meta dawk li tassew jaduraw jibdew jaduraw lill-Missier fl-ispirtu u fil-verità. Għax il-Missier ukoll, nies bħal dawn ifittex li jadurawh. Alla huwa spirtu, u dawk li jadurawh għandhom jadurawh fl-ispirtu u fil-verità”. Qaltlu l-mara: “Jiena naf li ġej il-Messija – dak li jgħidulu Kristu. Meta jiġi hu, kollox iħabbrilna”. Qalilha Ġesù: “Jiena hu, li qiegħed nitkellem miegħek”. Kien hemm ħafna Samaritani minn dik il-belt li emmnu f’Ġesù fuq ix-xhieda li tathom dik il-mara tant, li meta ġew ħdejh, bdew jitolbuh biex jibqa’ magħhom, u hu qagħad hemm jumejn. Imbagħad ħafna oħrajn emmnu minħabba kliemu, u lill-mara qalulha: “Issa mhux għax għedtilna int qegħdin nemmnu, imma għax aħna wkoll smajnieh, u sirna nafu li dan tassew hu s-salvatur tad-dinja”.

Ġw 4:5-15,19b-26,39a,40-42

i. Ġesù ġie f’belt tas-Samarija, jisimha Sikar, qrib il-biċċa art li Ġakobb kien ta lil ibnu Ġużeppi, fejn kien hemm ukoll il-bir ta’ Ġakobb. Kien għall-ħabta tas-sitt siegħa, u Ġesù, għajjien kif kien mill-mixi, qagħad bilqiegħda ħdejn il-bir.

Ġesù, għajjien kif kien mill-mixi
jieqaf f’Sikar, qrib il-bir ta’ Ġakobb
iġorr fuqu l-għejja ta’ Ġakobb,
ta’ żmien twil jaħrab minn ħuħ Esau (Ġen 33, 18-20)

iġorr fuqu l-għejja tagħna,
ta’ relazzjonijiet fraġli,
mixtieqa għal rabtiet li jagħtu l-ħajja (Ġożwe 24).

Irrifletti:

• Liema għejja ġġorr?

Ġesù weġibha: “Kieku kont taf id-don ta’ Alla u min hu dak li qiegħed jgħidlek: ‘Agħtini nixrob’, kieku int kont titolbu, u hu kien jagħtik ilma ħaj”.

Bħas-Samaritana, għaddej!
B’xi mod miexi, ir-rutina għaddejja,
il-barmil f’idejja!

Imma fil-fond
hemm għatx, hemm tfittxija.

Għalkemm Ġesù bla barmil,
ftit, ftit, ilaqqagħna mal-għatx tagħna
kif ukoll mal-għajn tal-ħajja.

Irrifletti:

• Kien hemm xi persuna, li għalkemm tidher fraġli, fetħitlek triq għall-ħajja?

iii. Imbagħad ħafna oħrajn emmnu minħabba kliemu, u lill-mara qalulha: “Issa mhux għax għedtilna int qegħdin nemmnu, imma għax aħna wkoll smajnieh, u sirna nafu li dan tassew hu s-salvatur tad-dinja”.

Hemm laqgħat li jċaqilqu fik xi ħaġa,
li jiżirgħu fik fiduċja biex terġa toħroġ,
isserrep fis-sħana biex taqta’ l-għatx li kien moħbi.

Imma hemm ukoll laqgħa unika
li fiha qalbek tistrieħ:
fejn tisma’ u tiltaqa’ mas-salvatur tad-dinja.

Irrifletti:

• Ieqaf ftit fil-presenza ta’ Ġesù, is-salvatur tad-dinja. Itolbu l-ilma.

3. Itlob il-Missierna

Dawn ir-riflessjonijiet u aktar tista’ ssibhom fuq il-Paġna ta’ Facebook tal-Knisja ta’ Sant’ Anna taż-Żebbiegħ, l-Imġarr.

Inħeġġuk tagħfas Follow.

F’intervista li kellu illum fuq RTK103, Mons. Arċisqof tkellem dwar diversi temi rilevanti u ta’ interess – fosthom dwar il-gwerra fil-Medju Orjent, dwar d-donazzjoni tal-organi, dwar iż-żgħażagħ u dwar il-media u l-fidi. L-Arċisqof ħabbar ukoll li 39 adult se jitgħammdu fil-Lejl Qaddis tal-Għid, wara mixja twila ta’ preparazzjoni fil-fidi.

• Dwar il-gwerra fil-Lvant Nofsani l-Arċisqof tenna li: “L-ewwel vittma tal-gwerra hija l-verità.”

• Dwar id-donazzjoni tal-organi: “Dak li ma jibqax iservi lili jista’ jintuża biex jagħti l-ħajja lil ħaddieħor.”

• Fuq l-isptarijiet tagħna: “M’hemmx mard, imma hemm il-morda; m’hemmx tbatija, imma hemm nies li qed ibatu.”

• Dwar il-media: “Ma tistax tbigħ lilek innifsek għal aktar likes.”

• Fuq il-fidi u l-magħmudija ta’ adulti: “Wara tant esperjenzi tul ħajjithom dawn l-adulti jagħżlu li jkunu Nsara bħalna.”

Aqra aktar fid-Dettal u ARA siltiet mill-Intervista ta’ Christine Delicata ma’ Mons. Arċisqof hawnhekk:

Il-Gwerra ġewwa l-Medju Orjent

L-Arċisqof talab biex aħna l-Insara nitolbu sabiex l-appell tal-Papa Ljun XIV għall-paċi u għad-diżarmament mill-armi jkollu effett, hekk kif jidher li s-sitwazzjoni tal-gwerra qed tiskala. L-Arċisqof qal li jidher li wara żewġ gwerer mondjali donnu ma tgħallimna xejn, għaliex il-gwerra donnu reġgħet saret normalità. Mons. Arċisqof qal li dan mhuwiex il-mument li wieħed jiġġudika t-tjubija jew il-ħsara li agħmel xi reġim u li filwaqt li huwa tajjeb li problemi pertinenti jiġu solvuti, wieħed irid iżomm f’moħħu l-ħsara li qed iġibu mhux biss l-attakki li qed iseħħu fl-Iran, iżda wkoll l-attakki li qed isiru fuq pajjiżi ġirien u oħrajn aktar imbiegħda.

Mons. Arċisqof qal li l-ewwel vittma tal-gwerra hija l-verità. Huwa qal li l-gwerer illum il-ġurnata nsegwuhom bl-immedjat aktar minn qatt qabel, imma dan ma jfissirx li dak li qed naraw u nisimgħu jikkorrispondi mar-realtà.

Huwa qal li tajjeb li nitolbu għal dawk li jixtiequ joħorġu mill-pajjiżi milquta mill-gwerra, inkluż diversi Maltin u Għawdxin. Huwa żied jgħid li huwa ta’ faraġ li l-awtoritajiet tal-Istat qed jagħmlu dak kollu li jistgħu biex il-Maltin jirritornaw lura Malta, u li saħansitra hemm pajjiżi ħafna akbar minn Malta li qed isibu diffikultajiet kbar biex jagħmlu dan.

Dwar l-Ittra Pastorali u d-Donazzjoni tal-Organi

Mistoqsi dwar għaliex l-Isqfijiet ħassew il-bżonn li joħorġu Ittra Pastorali dwar id-donazzjoni tal-organi fil-bidu ta’ dan ir-Randan Imqaddes, Mons. Arċisqof spjega li bħala Isqfijiet jixtiequ jitfgħu d-dawl tal-fidi fuq xi ħaġa li ħafna drabi l-poplu ma jkunx ċar fuqha. Huwa qal li l-Isqfijiet xtaqu jagħtu kelma ta’ fidi għal min ikun mħajjar jagħti organu minn tiegħu matul ħajtu jew wara mewtu.

Dwar organi prelevati minn persuna mejta, huwa tenna li x-xjenza llum tinsab f’livell avvanzat u li tiċċertifika li persuna tkun verament mejta qabel ma jittieħdu l-organi. Huwa enfasizza li huwa importanti li qatt ma tinqatel persuna biex jittieħdu l-organi tagħha.

L-Arċisqof qal li dan huwa att li ma jiswiex flus, iżda huwa għotja kbira li biha persuna verament tagħti lilha nnifisha bħala sinjal ta’ mħabba. Huwa enfasizza wkoll l-importanza li l-mewt tkun ċertifikata b’mod irriversibbli u li l-persuna stess tkun tat il-kunsens tagħha għal dan il-proċess. Żied jgħid li din hija xi ħaġa ta’ valur kbir, iżda żgur mhijiex obbligu; hija att ta’ libertà kbira.

Huwa qal ukoll li hemm donazzjonijiet ta’ organi oħra li jistgħu jsiru matul il-ħajja u mhux neċessarjament wara l-mewt. Semma bħala eżempju att kbir u sabiħ l-għoti tad-demm, li wkoll juri mentalità li taħseb f’ħaddieħor. Huwa tenna wkoll li d-donazzjoni tal-organi qatt m’għandha ssir transazzjoni kummerċjali, iżda għandha tkun għotja gratwita.

L-Arċisqof żied li min jagħżel li jagħti organu lil ħaddieħor waqt li jkun għadu ħaj għandu jkun assigurat li d-donatur se jgawdi ħajja ta’ kwalità u li dan ma jkunx ta’ ħsara għal saħħtu.

Viżti Pastorali fiċ-Ċentru tal-Onkoloġija u fil-Ħabs

Mons. Arċisqof tenna li, b’mod ġust, fil-jum tal-Ġimgħa bħala Nsara naħsbu b’mod partikolari fuq l-għotja ta’ Ġesù fuq is-salib, it-tbatija ta’ Marija u t-tbatija ta’ Ġesù Redentur.

Huwa qal li d-devozzjonijiet sbieħ bħall-Ħadd in-Nies, li sar fl-ewwel Ħadd tar-Randan, il-pellegrinaġġ bir-Redentur u dawk tal-Madonna tad-Duluri li se jsiru dalwaqt , għandhom ifakkruna wkoll li huwa importanti li niltaqgħu ma’ Ġesù li għadu jbati fid-dinja tal-lum.

L-Arċisqof qal li huwa għalhekk li jħoss il-bżonn, bħala ragħaj, li jżur il-Faċilità Korrettiva ta’ Kordin u anke ċ-Ċentru tal-Onkoloġija tas-SAMOC.

Mons. Arċisqof qal li jħoss il-bżonn li jkun hemmhekk fejn hemm it-tbatija, għaliex it-Tama u l-Ħniena ta’ Ġesù huma rilevanti f’kull ċirkostanza, anke f’dawk l-aktar diffiċli.

Meta l-pazjent iħossu kkurat b’imħabba, ikun qed iduq il-ħniena. Huwa saħaq fuq l-importanza li l-pazjent ikun ikkurat b’imħabba sal-aħħar, għaliex it-tama tagħna ma tieqafx ma’ din id-dinja, iżda hija ċċentrata fuq il-wegħda ta’ Ġesù li qed iħejji għamara għalina fis-sema.

Huwa qal li xi drabi jiltaqa’ ma’ pazjenti li bil-ħarsa ta’ għajnejhom juruk li dak kollu li għamlu f’ħajjithom f’dan il-mument ma għadux ta’ wens; issa hija biss it-tama f’Ġesù li qed tagħtihom paċi kbira.

Dwar il-ħniena, l-Arċisqof qal ukoll li jekk ħabsi għandu dritt għall-parole, is-sentenza tiegħu għandha titnaqqas jekk ikollu kondotta tajba, u li s-soċjetà għandha tagħtih ċans biex ikollu bidu ġdid wara li joħroġ mill-ħabs.

L-Arċisqof jitkellem fuq il-Living Will

Mistoqsi dwar il-living will, huwa qal li din hija ħaġa tajba għaliex toffri ċarezza u anke possibbiltà li hija aċċettabbli fit-tagħlim Nisrani. Spjega li ħadd mhu obbligat jaċċetta terapija inutli. Għalhekk, permezz tal-living will, persuna tista’, waqt li għadha f’sensiha, tagħti direzzjoni lil dawk li jkunu qed jieħdu ħsiebha sabiex ikunu jafu minn qabel li ċerti terapiji li jkunu inutili hija ma tixtieqx tirċevihom.

Huwa semma wkoll lil Papa Ġwanni Pawlu II, li f’ħin minnhom meta kienu qed jitimugħ permezz ta’ pajp minn qata fi griżmejh qal: “Ħalluni mmur fid-dar ta’ Missieri.”

Mons. Arċisqof qal li m’hemmx għalfejn nagħmlu akkaniment terapewtiku. Huwa spjega li l-living will ma jistax jinkludi l-ewtanasja, iżda jista’ jinkludi x-xewqa ta’ persuna li ma tibqax tirċievi trattament mediku jew terapija li ttawwal il-ħajja b’mod artifiċjali u li żżid it-tbatija b’mod inutli.

Dwar iż-Żagħżagħ u dawk li se jagħmlu l-Griżma

Mons. Arċisqof qal li hija x-xewqa tiegħu li jiltaqa’ ma’ dawk ż-żgħażagħ li se jagħmlu l-Griżma personalment, għaliex m’għandux l-opportunità li jamministra l-Griżma f’kull parroċċa. Spjega li f’Malta hemm madwar 70 parroċċa, u ħafna minnhom jagħmlu żewġ ċelebrazzjonijiet jew aktar tal-Griżma. Żied li f’Malta l-Isqof Awżiljarju u l-Isqfijiet Emeriti wkoll jgħinu f’dan is-servizz.

Huwa qal li dawn il-laqgħat jagħtuh l-opportunità li jiltaqa’ maż-żgħżagħ, jismagħhom u huma wkoll jisimgħuh.

Huwa tenna li meta jżur l-iskejjel jippreferi ukoll jagħmel sessjonijiet ta’ djalogu, fejn l-istudenti jitkellmu u jagħmlu domandi. Spjega li l-istudenti mhux biss ikollhom kurżità dwar x’jagħmel l-Isqof, iżda wkoll ikollhom domandi eżistenzjali li jolqtuhom. Huwa qal li dan jagħtih l-opportunità li jiffoka r-risposta tiegħu, għal dak li jkunu għaddejin minnu l-istudenti.

Mons. Arċisqof qal li din hija ġenerazzjoni li għadha quddiema sfidi kbar, iżda wkoll għandha tamiet u possibbiltajiet kbar. Huwa qal li jinkwetah b’mod partikolari l-addiction għas-social media, u saħaq li huwa importanti ħafna li ż-żgħażagħ jerġgħu jiskopru l-kuntatt personali bejniethom, mal-familji u mas-soċjetà. Qal li din hija kemm sfida kif ukoll opportunità għall-Knisja biex tgħin lin-nies jerġgħu jiltaqgħu bejniethom.

Huwa żied li dawn il-mezzi huma meħtieġa wkoll għall-evanġelizzazzjoni, iżda hemm bżonn noqogħdu attenti li ma jsirux kawża ta’ aljenazzjoni minflok komunikazzjoni soċjali. Qal li jekk il-mobile iżomm lill-persuna magħluqa fiha nfisha, dan mhuwiex healthy. Huwa awgura li ż-żgħażagħ isibu bilanċ bejn l-użu ta’ dawn il-mezzi u li qatt ma jabbandunaw il-kuntatt personali.

Il-Knisja u l-Media

Mons. Arċisqof qal li rridu nammettu li fid-deċennji li għaddew ix-xandir kien importanti ħafna, iżda llum il-preżenza diġitali saret essenzjali. Huwa qal li jibqa’ rilevanti li l-Knisja titfa’ dawl Nisrani fuq dak li hu importanti u fuq dak li qed jiġri madwarna. Fakkar li l-ewwel radju fuq livell internazzjonali kien ir-Radju tal-Vatikan, u li Guglielmo Marconi kien ta l-għarfien xjentifiku tiegħu lil Papa Piju XII biex jinbeda dan ir-radju.

Huwa fakkar ukoll li Gutenberg, meta stampa l-ewwel ktieb tiegħu, dan stampa il-Bibbja.

Mons. Arċisqof qal li tajjeb niftakru fil-kommissjoni li ta Ġesù lid-dixxipli biex ixandru l-Evanġelju sat-truf kollha tal-art, u li Ġesù nnifsu huwa l-Kelma magħmul bniedem. “Aħna għandna messaġġ ta’ min jisimgħu,” qal l-Arċisof.

L-Arċisqof qal li wieħed irid jibqa’ dejjem leali għall-ethos tiegħu. “Ma tistax tbigħ lilek innifsek għal aktar likes,” tenna l-Arċisqof. Huwa qal li l-media tal-Knisja għandha d-dmir li tagħti l-opportunità lil min għandu ċans jismagħha biex jisma’ l-messaġġ tagħha.

Mons. Arċisqof qal li huwa jemmen li kieku San Ġorġ Preca jisab fostna fi żmiena huwa kien jagħmel użu mill-mezzi komunikattivi tal-lum, għax hu dejjem uża l-mezzi kollha li kellu għad-dispożizzjoni tiegħu fi żmienu. Fakkar li mhux biss kien jipprietka fil-pjazez, iżda kien ukoll jistampa kotba, pamflets u manwali.

Huwa żied li San Ġorġ Preca kien jgħid li t-tagħlim huwa l-għajn ta’ kull ġid, u li għalhekk il-Knisja, permezz tal-media tagħha, trid tagħti għarfien mibni fuq il-verità. Saħaq li ħadd m’għandu dritt jippretendi li l-mezzi tal-Knisja jintużaw biex tixxandar mibegħda. “M’hemmx spazju għal min irid jippromwovi mibegħda, razziżmu jew intolleranza,” tenna Mons. Arċisqof.

Mons. Arċisqof qal li tkun ħasra kbira jekk il-media tal-Knisja tkun strument ta’ qerq jew inġustizzja. Żied li huwa dmir ta’ xhieda biex anke l-media tal-Knisja tikkoreġi l-iżbalji tagħha jekk xi ħadd qatt jitpoġġa f’dawl ħażin.

39 Adult se jitgħamdu fil-lejl tal-Għid

L-Arċisqof ħabbar li fil-Lejl tal-Għid ta’ din is-sena se jitgħammdu 39 adult li ilhom f’mixja ta’ fidi. Huwa qal li fosthom hemm grupp sabiħ ta’ persuni li jitkellmu bil-lingwa Ċiniża. Spjega li huwa jipprova juża l-lingwa ta’ kull persuna waqt l-amminstrazzjoni tar-rit tal-Magħmudija, u li din is-sena se jintużaw madwar 10 lingwi differenti.

Din is-sena, il-magħmudijiet tal-adulti se jinqasmu fi tnejn: waħda mmexxija mill-Isqof Awżiljarju Mons. Joseph Galea-Curmi fil-Katedral tal-Imdina, u oħra mmexxija minn Mons. Arċisqof stess fil-Kon-Katedral ta’ San Ġwann ġewwa l-Belt. Huwa qal li din hija l-ewwel sena li qed jiffaċċjaw dik li sejjaħ “problema sabiħa”: 39 adult li jixtiequ jitgħammdu f’daqqa fil-Lejl Imqaddes tal-Għid u li għalhekk ideċidew jaqsmu l-magħmudija f’żewġt ċelebrazzjonijiet differenti biex dawn isiru ilkoll b’dinjità. L-Arċisqof qal li dan huwa fenomenu li qed jidher ukoll fl-Ewropa u fl-Amerika, fejn mijiet u eluf ta’ adulti qed iħossu l-bżonn li jsiru Nsara.

Huwa qal li din hija aħbar tajba għall-Knisja.

l-Arċisqof qal li l-kultura reliġjuża u popolari tagħna għadha strument li permezz tagħha wieħed jista’ jiltaqa’ mal-messaġġ Nisrani. Huwa tenna li wieħed jista’ jara simbolu jew sinjal u jgħin lil persuna tibqa’ taħseb u jgħinha tiltaqa’ ma’ Ġesù. Din l-għażla li wħud jagħżlu l-magħmudija f’età kbira lili tikkommovini, tenna l-Arċisqof. “Wara tant esperjenzi differenti tul ħajjithom huma jagħżlu li jkunu Nsara bħalna!” Peress li tgħammidna trabi, aħna din jaf li neħduha for granted, imma huwa fakkar li kull Nisrani fil-Lejl Imqaddes tal-Għid jerġa jġedded il-wegħdiet tal-magħmudija tiegħu permezz tar-rit tat-tiġdid tal-magħmudija.

Huwa awgura lil kull min jista’ jmur għall-Velja tal-Għid fil-parroċċi biex jagħmel dan. Mons. Arċisqof ħeġġeġ ukoll għall-parteċipazzjoni fit-Tridu tal-Għid li jibda b’Ħamis ix-Xirka. Huwa fakkar li nhar il-Ġimgħa l-Kbira tajjeb li nipparteċipaw mhux biss fil-purċissjonijiet imma wkoll fil-Funzjoni tal-Passjoni Solenni tal-Mulej u fl-Adorazzjoni tas-Salib. Huwa fakkar li Sibt il-Għid huwa mument ta’ silenzju kbir li jwassal sa’ filgħaxija, għall-Velja Solenni tal-Għid.

Huwa temm billi ta l-barka tiegħu lil kulħadd.

Agħfas Subscribe biex tirċievi dawn l-Artikli. Inħeġġuk tagħfas Follow fuq il-Paġni ta’ Kattoliċi Maltin ta’ Facebook u Instagram biex issegwi aktar minn dak li qed jiġri fil-Knisja Maltija.

Dawn il-Parroċċi ħasbu li jiġbru flimkien madwar Ġesù Ewkaristija lil 300 żagħżugħ u żagħżugħha li jattendu l-gruppi taż-żgħażagħ tagħhom.

Hekk kif Ġesù jipprepara lilu nnifsu għall-Passjoni fl-Ort tal-Ġetsemani, huwa jmur ħdejn id-dixxipli u jsibhom reqdin. Huwa jgħid lil Pietru:

Ġesù jitlob lid-dixxipli biex jibqgħu u jishru miegħu, u hekk għamlu dawn l-adolexxenti hekk kif it-tema ta’ dawn l-Eżerċizzi kienet Remain.

Remain ġie ppreżentat mill-preżentatur żagħżugħ Keane Cutajar u animat minn Gianluca Bezzina fost oħrajn. Is-Sależjan Br. Antoine Galea mexxa r-riflessjoni fejn fakkar liż-żgħażagħ preżenti li Alla ma jinsiex lil dawk li jħobbuh u li l-akbar ħaġa li jistgħu jagħmlu f’ħajjithom hija li jibqgħu fih. Huwa tenna li Alla huwa fidil u jibqa’ dejjem miegħek f’kull stadju tal-ħajja. Fakkar liż-żgħażagħ li l-qdusija hija l-vokazzjoni tagħna ikoll u din hija xi ħaġa possibli hekk kif il-qaddisin huma bnedmin bħalna.

Mument ta’ adorazzjoni quddiem Ġesù Sagramentat segwa dawn ir-riflessjonijiet, u ma naqasx ukoll ħin għall-pizza u għal-logħob.

Jekk tixtieq tingħaqad ma’ grupp bħal dawn, ibagħtilna DM fuq Instagram @kattolicimaltin jew ibgħat fuq 79963200.

Għal aktar ritratti kellem lil-leader tal-grupp tiegħek.

X’qed jiġri bħalissa?

L-Istati Uniti flimkien mal-Iżrael nedew diversi attakki b’bumbardamenti fl-Iran. Is-Segretarju tal-Istat Amerikan Marco Rubio tenna li l-Istati Uniti qed tmexxi din l-operazzjoni biex ġġib fix xejn il-kapaċita’ distruttiva tal-missili ballistiċi Iranjani.

Skont Rubio, L-Iran kien qed jipproduċi mal-100 missila fix-xahar bl-intenzjoni li tant jipproduċu missili li jistabillixxu lilhom infushom bħala qawwa militari detrimentali fir-Reġjun. Sussegwentament, din is-setgħa tagħtihom l-immunita’ neċessarja biex jiproduċu l-ewwel armi nukleari tagħhom.

L-Eks Assistent Segretarju tad-Difiża Amerikana għal Medju Orjent, Dana Stroul, qalet li din l-operazzjoni hija l-ewwel azzjoni militari tax-xorta tagħha għaliex fiha l-Istati Uniti u l-Iżrael ħadmu tant viċin ta’ xulxin li qasmu ma’ xulxin data, riżorsi u anke agħmlu attaki konġunti.

Minn naħa tagħhom, l-Iran qalu li dan huwa attak malin għaliex saru hekk kif ġew fi tmiemhom diskussjonijiet diplomatiċi bejn il-ġiex partijiet ġewwa Geneva.

Ġesù fid-Deżert

Fl-Evanġelju skont San Mattew, li naqraw fl-Ewwel Ħadd tar-Randan, insibu lil Ġesù jsum għal erbgħin jum u jiġi mġarrab mix-xitan. Ix-xitan jippreżenta lil Ġesù tliet tentazzjonijiet, u t-tielet waħda hija din li ġejja:

“Għal darb’oħra x-xitan ħadu miegħu fuq muntanja għolja ħafna, urieh is-saltniet kollha tad-dinja u l-glorja tagħhom, u qallu: ‘Dawn kollha nagħtihom lilek jekk tinxteħet tadurani.’”

Ix-xitan jipprova jaqleb ta’ taħt fuq il-missjoni Messjanika u jippreżentaha bħala tentazzjoni lil Ġesù.

Madankollu, ilkoll nafu li s-Saltna ta’ Ġesù mhijiex ta’ din id-dinja. Fil-ktieb Jesus of Nazareth, il-Papa Benedittu XVI jfakkarna li min ma għandux is-setgħa fis-sema ma għandux is-setgħa vera fuq l-art. Fil-fatt, fl-Iskrittura nsibu li lil Ġesù “ingħatat kull setgħa fis-sema u fl-art” (Mattew 28:18).

Ġesù jirrifjuta din it-tentazzjoni tax-xitan biex jurina li s-Saltna tiegħu mhijiex ta’ din id-dinja. Il-glorja ta’ din id-dinja, bil-Grieg δόξα (doxa), hija illusorja u tiġi fix-xejn. Dan huwa bil-kuntrarju tas-Saltna ta’ Alla, li tikber permezz tal-umiltà u li tibqa’ għal dejjem.

Benedittu XVI jfakkarna li s-saltniet ta’ din id-dinja jibqgħu ta’ din id-dinja, u li kull min jistqarr li se jibni saltna perfetta fid-dinja bela’ l-lixka u l-velenu ta’ Satana. Ġesù ma ġiex fid-dinja biex jagħtina saltna ta’ din l-art; Ġesù ġie biex jurina lill-Missier.

Satana jipprova joffri saltna mingħajr prova u mingħajr is-Salib, iżda fit-talba tal-Missierna, li għallimna Ġesù, nitolbu: “la ddaħħalniex fit-tiġrib.” Dan ifisser li waħidna ma nistgħu nagħmlu xejn, u li huwa biss bil-qawwa ta’ Alla li nistgħu negħlbu l-ħażin u naslu biex inkunu werrieta tas-Saltna tas-Sema.

Għalhekk, filwaqt li ninsabu f’din id-dinja, aħna l-Poplu ta’ Alla ma għandniex infittxu li nibnu Imperi fuq l-art, iżda li nħabirku għas-Saltna ta’ Alla li diġà tinsab fostna.

Huwa għalhekk li n-Nisrani m’għandux iħossu komdu quddiem attitudni u diskors qarrieqi li jipromovi il-gwerra u l-armi bħala l-meżż ta’ kif tiġi stabilita Saltna ta’ paċi fuq din l-art.

Fl-istess waqt, l-Papa Ljun XIV ifakkarna kif ma teżistix Knisja separata mill-art, imma Knisja waħda ta’ Kristu inkarnata fl-istorja.1 Għalhekk huwa d-dmir tagħna li noħolqu ambjent li, bil-fidi, jippromwovi l-paċi vera fuq din l-art, filwaqt li nibqgħu dejjem orjentati lejn Alla u lejn s-Sema pajjiżna.

F’De Civitate Dei, Santu Wistin jikteb:

“Ngħixu f’din id-dinja (in hoc saeculo) ma jfissirx li għandna dar permanenti, iżda li aħna f’pellegrinaġġ lejn it-twettiq sħiħ tal-Belt ta’ Alla.”

Il-Gwerra u s-Saltna tal-Paċi

Mhijiex l-ewwel darba li, f’sitwazzjonijiet ta’ gwerra, nisimgħu lil xi wħud jinvokaw it-twemmin reliġjuż biex jiġġustifikaw atti li jġibu l-mewt. Benedittu XVI jfakkarna li meta l-ambizzjonijiet temporali u l-fidi jitħalltu flimkien, it-twemmin reliġjuż jispiċċa jakkomoda l-ambizzjonijiet politiċi u mondani.

Is-Saltna li jġib miegħu Ġesù hija għalhekk saltna liberatorja, maqtugħa minn kull ambizzjoni mondana.

Ix-xitan wiegħed lil Ġesù s-saltna falza tiegħu fuq kundizzjoni waħda:

“Dawn kollha nagħtihom lilek jekk tinxteħet tadurani.”

L-isforzi u l-wegħdiet fierħa ta’ dawk li jridu jibnu saltniet fuq din l-art jitolbuna nwarrbu l-fidi tagħna f’Alla biex nemmnuhom.

J’Alla li aħna l-Insara nagħrfu li min iwiegħed Saltna fuq din l-art mhux qed jippreżentalna l-pjan veru tal-fidwa li wettaq Ġesù l-Messija, iżda tentazzjoni li ġejja mil-Ħażin.

Nadurawk O Ġesù u nberkuk, għax b’salibek u l-mewt tiegħek inti fdejtna.

Aqsam dan l-Artiklu ma’ sħabek.
Agħfas Subscirbe biex tibda tirċievi dawn l-artikli.

Għeżież ħuti!

Ir-Randan hu ż-żmien li fih il-Knisja, b’għożża ta’ omm, tistedinna nerġgħu nqiegħdu l-misteru ta’ Alla fiċ-ċentru tal-ħajja tagħna, biex il-fidi tagħna terġa’ ssib il-ħeġġa u l-qalb ma tintilifx qalb it-tħassib u d-distrazzjonijiet ta’ kuljum.

Kull mixja ta’ konverżjoni tibda meta nħallu l-Kelma ta’ Alla tilħaqna u nilqgħuha bi ħlewwa tal-ispirtu. Allura hemm rabta bejn id-don tal-Kelma ta’ Alla, l-ispazju ta’ ospitalità li noffrulha u l-bidla li hija twettaq. Għalhekk, il-mixja tar-Randan issir okkażjoni tajba biex niftħu widnejna għal-leħen tal-Mulej u nġeddu d-deċiżjoni li nimxu wara Kristu, u miegħu nterrqu t-triq li titla’ lejn Ġerusalemm, fejn iseħħ il-misteru tal-passjoni, il-mewt u l-qawmien tiegħu.

Nisimgħu

Din is-sena nixtieq niġbed l-attenzjoni, qabelxejn, fuq l-importanza li nagħmlu wisa’ lill-Kelma permezz tas-smigħ, għax id-disponibbiltà li nagħtu widen hija l-ewwel sinjal li bih nuru x-xewqa tagħna li nidħlu f’relazzjoni mal-oħrajn.

Alla nnifsu, meta jirrivela lilu nnifsu lil Mosè mis-siġra tal-għollieq taqbad, jurih li s-smigħ hu karatteristika distintiva tal-essri tiegħu: “Jien ħarist u rajt it-tbatija tal-poplu tiegħi fl-Eġittu. U jien smajt il-karba tagħhom” (Eż 3:7). Is-smigħ tal-karba tal-magħkus huwa l-bidu ta’ storja ta’ ħelsien, li fiha l-Mulej idaħħal ukoll lil Mosè, u jibagħtu jiftaħ triq ta’ salvazzjoni għal uliedu li spiċċaw fil-jasar.

Huwa Alla li jinvolvi, li llum jilħaq lilna wkoll bil-ħsibijiet li bihom tħabbat qalbu. Għalhekk, is-smigħ tal-Kelma fil-liturġija jedukana għal smigħ iktar veru tar-realtà: fost il-ħafna ilħna li nisimgħu fil-ħajja personali u soċjali tagħna, l-Iskrittura Mqaddsa tagħtina l-ħila nagħrfu dik li tielgħa minn qalb it-tbatija u l-inġustizzja, biex ma tibqax mingħajr tweġiba. Li nidħlu f’din id-dispożizzjoni interjuri ta’ reċettività jfisser inħallu llum lil Alla jgħallimna nisimgħu bħalu, biex nagħrfu “l-qagħda tal-foqra rrappreżentata minn karba li, fl-istorja tal-umanità, tisfida kontinwament lill-ħajja tagħna, is-soċjetajiet tagħna, is-sistemi politiċi u ekonomiċi u, fl-aħħar imma mhux l-inqas, lill-Knisja wkoll”.[1]

Insumu

Jekk ir-Randan hu żmien ta’ smigħ, is-sawm huwa prattika konkreta li tiftħilna qalbna biex nilqgħu l-Kelma ta’ Alla. Fil-fatt, is-sawm mill-ikel hu taħriġ axxetiku antik ħafna u insostitwibbli fil-mixja tal-konverżjoni. Proprju għaliex imiss lill-ġisem, jagħmel iżjed evidenti dak li aħna “mġewħa” għalih u dak li nqisuh essenzjali għall-għajxien tagħna. Għalhekk iservi biex niddixxernu u npoġġu f’ordni l-“aptiti” tagħna, biex inżommu dejjem ħaj il-ġuħ u l-għatx tal-ġustizzja, u nevitaw ir-rassenjazzjoni, waqt li nħarrġuhom biex isiru talba u responsabbiltà lejn il-proxxmu.

Santu Wistin, b’finezza spiritwali, jurina t-tensjoni bejn iż-żmien preżenti u t-twettiq futur li tikkaratterizza dan il-ħarsien tal-qalb, meta josserva li: “Matul il-ħajja fuq din l-art huma l-bnedmin li għandu jkollhom il-ġuħ u l-għatx għall-ġustizzja, imma hu fil-ħajja l-oħra li mbagħad naqtgħuhom. L-anġli jixbgħu b’dan il-ħobż, b’dan l-ikel. Imma l-bnedmin huma mġewħa għalih, huma kollha xewqana għalih. Din ix-xewqa twessa’ l-qalb, tkabbar il-ħila tagħha”.[2] Is-sawm, mifhum b’dan il-mod, jagħtina mhux biss li niddixxiplinaw ix-xewqa, li nsaffuha u nagħmluha iktar ħielsa, imma anki li nwessgħuha, b’mod li hi ddur lejn Alla u torjenta ruħha għall-għemil it-tajjeb.

Madankollu, biex is-sawm iżomm sħiħa l-verità evanġelika tiegħu u jaħrab mit-tentazzjoni li l-qalb tħossha mkabbra, għandu dejjem jgħix fil-fidi u fl-umiltà. Hemm bżonn li hu jibqa’ b’għeruqu mniżżla fil-komunjoni mal-Mulej, għax “ma jkunx isum tassew minn ma jafx jitrejjaq bil-Kelma ta’ Alla”.[3] Bħala sinjal viżibbli tal-impenn interjuri tagħna li, bl-għajnuna tal-grazzja, naħarbu mid-dnub u l-ħażen, is-sawm għandu jinkludi wkoll għamliet oħra ta’ ċaħda li jgħinuna niksbu stil ta’ ħajja iżjed sobrju, għax “l-awsterità biss li ssaħħaħ il-ħajja Nisranija u tagħmilha iktar awtentika”.[4]

Għalhekk nixtieq nistedinkom għal għamla ta’ ċaħda konkreta ħafna u spiss ftit li xejn apprezzata, jiġifieri dik mill-kliem li bih nidorbu u nweġġgħu lill-proxxmu tagħna. Ejjew nibdew inżarmaw il-lingwaġġ, nagħtu daharna lil kliem li jaqta’ fil-laħam il-ħaj, lill-ġudizzju immedjat, lill-paroli fuq min mhux preżenti u ma jistax jiddefendi ruħu, lill-kalunnji. Minflok, ħa nagħmlu sforz biex nitgħallmu nqisu kliemna u nrawmu fina l-ġentilezza: fil-familja, bejn il-ħbieb, fuq il-postijiet tax-xogħol, fuq il-midja soċjali, fid-dibattiti politiċi, fil-mezzi ta’ komunikazzjoni, fil-komunitajiet Insara. U hekk flok il-ħafna kliem ta’ mibegħda jkollna kliem ta’ tama u ta’ paċi.

Flimkien

Fl-aħħar nett, ir-Randan jikxef id-dimensjoni komunitarja tas-smigħ tal-Kelma u tal-prattika tas-sawm. Anki l-Iskrittura tisħaq fuq dan l-aspett b’ħafna modi. Ngħidu aħna, meta tirrakkonta, fil-ktieb ta’ Neħemija, li l-poplu nġabar biex jisma’ l-qari pubbliku tal-ktieb tal-Liġi u, huwa u jipprattika s-sawm, kien dispost għall-istqarrija tal-fidi u għall-qima, biex hekk kien lest iġedded il-patt tiegħu ma’ Alla (ara Neħ 9:1-3).

Bl-istess mod, il-parroċċi tagħna, il-familji, il-gruppi ekkleżjali u l-komunitajiet reliġjużi huma msejħa biex fir-Randan jagħmlu flimkien mixja, li fiha s-smigħ tal-Kelma ta’ Alla, kif ukoll tal-karba tal-foqra u tal-art, issir għamla ta’ ħajja komuni, u s-sawm jgħin biex ikun hemm indiema vera. F’dan ix-xefaq, il-konverżjoni, barra l-kuxjenza ta’ kull wieħed u waħda, tmiss ukoll l-istil tar-relazzjonijiet, il-kwalità tad-djalogu, il-ħila li nħallu r-realtà tinterrogana u nagħrfu dak li jorjenta tassew ix-xewqa, kemm fil-komunitajiet ekkleżjali tagħna, u kemm fl-umanità għatxana għall-ġustizzja u r-rikonċiljazzjoni.

Għeżież, ejjew nitolbu l-grazzja ta’ Randan li jiftħilna aktar widnejna għal Alla u għall-foqra. Nitolbu l-qawwa ta’ sawm li jgħaddi wkoll mill-ilsien, biex jonqos il-kliem li jweġġa’ u jikber l-ispazju għal-leħen tal-ieħor. U nħabirku biex il-komunitajiet tagħna jsiru mkejjen li fihom il-karba ta’ min qed ibati ssib akkoljenza u s-smigħ inissel mixjiet ta’ ħelsien, u jagħmilna iktar pronti u attenti biex ngħinu ħalli tinbena ċ-ċiviltà tal-imħabba.

Minn qalbi nbierek lilkom ilkoll u l-mixja tagħkom f’dan ir-Randan.

Mill-Vatikan, 5 ta’ Frar 2026, Tifkira ta’ Sant’Agata, Verġni u Martri.

LJUN PP. XIV

Miġjub għall-Malti minn Francesco Pio Attard

[1] Eżortazzjoni appostolika Dilexi te (4 ta’ Ottubru 2025), 9.

[2] Santu Wistin, Is-siwi tas-sawm, 1, 1.

[3] Benedittu XVI, Katekeżi (9 ta’ Marzu 2011).

[4] San Pawlu VI, Katekeżi (8 ta’ Frar 1978).

Omelija tal-Isqof ta’ Għawdex Anton Teuma fil-Quddiesa bir-Rit tat-Tberik tat-Tarbija fil-Ġuf. Santwarju Nazzjonali tal-Madonna Ta’ Pinu, Għarb.

Omelija tal-Isqof ta’ Għawdex Anton Teuma

Sorpriża u ftit tal-biża’ ma’ kull tqala

Żgur li ħafna minnkom qegħdin hawn biex titolbu lill-Mulej ikompli jgħinkom fit-tqala tagħkom. Qegħdin hawn forsi minħabba s-sorpriża li tiġi ma’ kull tqala… għax kultant tqala tkun mistennija u mixtieqa forsi għal żmien twil, u kultant tqala ma tkunx mistennija u forsi mhix mixtieqa.

Ikun hemm xi ftit tal-biża’. Min jaf kif u min ser tkun din it-tarbija tagħna? Min jaf jekk tkunx f’saħħitha, ikunx hemm diffikultajiet? Uħud minna forsi ġa jafu li hemm xi diffikultajiet u allura qegħdin hawn biex nitolbu lill-Mulej permezz ta’ Ommu Marija biex ikun magħna u jidħol għalina.

It-tarbija mhix tagħna imma rigal mogħti lilna minn Alla

Dan ifisser li t-tarbija li hemm fikom, anki jekk forsi ħdimtu u stinkajtu, ippreparajtu u għamiltu li stajtu biex din it-tarbija tiġi, ma tiddependix totalment minna. Din it-tarbija mhix biss tagħna… anzi, mhix tagħna. Ikun ftit diffiċli nammettu ċerti veritajiet. It-tarbija li hemm fina hi don li ġie mogħti lilna minn Alla.

Mhux biss intom li ġejtu hawn biex titolbu l-barka fuq it-tqala tagħkom, imma wkoll min ilu jistenna u forsi għadu jistenna biex ikollu tarbija, dawk hemm barra u forsi hawn ġew stess li għandhom xewqa kbira li jkollhom tarbija imma ma jistgħux, xi drabi anki wara li jkunu użaw il-mezzi artifiċjali kollha possibbli. Dan kollu jurina li t-tarbija mhix tagħna: it-tarbija hi rigal fdat f’idejna.

It-tfal mhumiex oġġett li jissodisfa l-bżonnijiet imma persuni b’dinjità

Bħalissa ħafna drabi din inħossuha u ngħixuha b’ċertu rispett, biża’ u qima lejn Alla. Imma jiġrilna li meta jgħaddi ftit ieħor, meta titwieled it-tarbija, jew forsi anki qabel ma twieldet, ippretendejnieha, ridnieha, u forsi ’l quddiem għad nippretenduha u nqisuha bħala proprjetà tagħna. Meta persuna ssir proprjetà, oġġett, naqgħu f’ħafna żbalji, għax oġġett iservi biex jissodisfa l-bżonnijiet tagħna, bħalma tista’ tkun karrozza, kamra tas-sodda, kċina u kull oġġett li hemm fid-dar tagħna. L-ebda persuna li hemm fid-dar, la r-raġel, la l-mara u inqas u inqas it-tfal, ma jistgħu jservu biex jissodisfaw il-bżonnijiet tagħna, għax inkella ma jkunux aktar persuna imma jsiru oġġett. L-ebda persuna fostna llejla ma tieħu gost jekk tkun meqjusa bħala oġġett u mhux stmata bid-dinjità ta’ persuna kif tassew aħna.

Kif u meta nfittxu lil Alla?

Il-Vanġelu tal-lum (Mt 4:12-23) jurina b’mod ċar daqs il-kristall li kull persuna, inklużi aħna, imma fuq kollox it-trabi li ser jitwieldu, huma rigal ta’ Alla. Huma sejħa li Alla qiegħed jagħmlilna. Aħna nistgħu nwieġbu għaliha b’diversi modi. Nistgħu nfittxu biss lil Alla meta aħna għandna bżonnu, fid-drabi meta nindunaw li m’aħniex awtosuffiċjenti, li mhux kollox jiddependi minna. Infittxuh għax nibżgħu li tista’ tiġrilna xi ħaġa. Imma ħadd ma jieħu gost b’relazzjoni ta’ dan it-tip. Jekk ħabib jew ħabiba, ir-raġel jew il-mara jfittxuk biss meta għandhom bżonnok, inti sempliċement tħossok użat u tieħu għalik. Alla ma jiħux għalih, anzi, aktar ikun preżenti fil-ħajja tagħna anki jekk infittxuh biex ninqdew bih u nużawh. Imma aħna, meta qed infittxu lil Alla sempliċement għax qed nibżgħu jew inħossu l-bżonn, u fil-bqija ta’ ħajjitna nwarrbuh fil-ġenb, jaħasra nkunu qed nitiflu ħafna. Inkunu qed ninsew dik il-verità li bħalissa kull wieħed u waħda minnkom, missirijiet u ommijiet, qegħdin tgħixu: li tafu, tħossu u konvinti li t-tarbija li hemm fil-ġuf tal-omm ma tiddependix għalkollox minnkom imma hi rigal ta’ Alla.

Sejħa minn Alla biex tkunu ġenituri tat-tarbija li fdalkom f’idejkom

Allura nħeġġiġkom illejla biex din il-verità ma tinsewhiex. Meta Ġesù jgħaddi u jsejjaħ lid-dixxipli tiegħu fuq xatt l-għadira tal-Galilija – lil Pietru, Indrì, Ġakbu u Ġwanni – ifakkarna li huwa sejjaħ diġà lil kull wieħed u waħda minna. U qiegħed isejjaħ lilkom biex tkunu ġenituri ta’ din it-tarbija illi hu qiegħed jafdalkom f’idejkom.

Inħeġġiġkom minn qalbi biex ma tinsewx din is-sejħa illi intom għandkom. Diġà l-ħajja tagħkom m’għażiltuhiex intom, ma ddeċidejtux intom li tgħixu. U wliedkom, it-tarbija li hemm fikom, lanqas hi ma għażlet li tkun fikom. U lanqas intom m’għażiltuha biex tkun fikom, għax jekk xtaqtu tarbija, ma tafux liema tarbija. Ma ddeċidejtux intom lil min, min ser tkun jew ikun dak li għandkom fil-ġuf tagħkom.

It-tarbija ssir oġġett meta l-ġenituri jinsew li Alla jsejjaħ

Inħeġġiġkom biex ma tinsewhiex din il-verità, għax jekk ninsew din ir-realtà, ’il quddiem, imma anki minn issa, tispiċċaw tieħdu ħafna żbalji. Jekk it-tarbija tkun sempliċement oġġett u intom għandkom x’tagħmlu, ma tridu xejn biex kif ikollha xahrejn jew tlieta, titfgħuha f’childcare centre. Jiena qatt ma nixba’ nikkundanna ċ-childcare centres sal-età ta’ sentejn. Dan jagħmluh il-psikologi kollha bis-sens.

Imma meta t-tarbija ma tibqax suġġett, persuna, u l-ewwel jiġu l-flus, il-kamra tas-sodda sabiħa illi rrid nidħol għal-loan ta’ ma nafx kemm biex nixtriha, u allura rrid immur naħdem… dik it-tarbija ssir oġġett inqas importanti mill-kamra tas-sodda. Ara kemm għandu raġun Ġesù u kemm jagħmel sens dak li qegħdin tagħmlu llejla, meta intom verament konxji li t-tarbija li qed iġġorru fikom hija rigal, persuna u mhux oġġett. Oqogħdu attenti, għax faċli jasal il-waqt meta dik il-persuna li hemm fikom tibdew tqisuha bħala oġġett.

Tnejn li jisseparaw, lit-tfal jibdew iqisuhom jew bħala xkiel jew bħala proprjetà, bħala vleġġa fil-ħorġ li biha jisparaw għal xulxin. Għiduli jekk humiex qed iqisu lit-tfal bħala oġġett! Jinqdew bit-tfal biex iweġġgħu lil xulxin. Għiduli jekk meta tuża l-kelma ‘tinqeda’ hux qiegħed tqis lil dawk il-persuni bħala oġġett! U nista’ nibqa’ sejjer b’elf eżempju ieħor.

Nitolbu lil Alla jgħinna nilqgħu lil uliedna bħala persuni

Ejjew nitolbu lill-Mulej illum biex mhux biss ineħħilna l-biża’ u jagħtina ċ-ċertezza li kollox ikun sew, imma biex dak il-biża’, dak ir-rispett, din it-tensjoni jħallihomlna, ħalli lil uliedna nqisuhom dejjem bħala persuna, rigal li ġej minnu u mhux proprjetà tagħna. Nitolbuha lill-Madonna llejla din il-grazzja għalikom. U jekk aħna lit-tfal inqisuhom bħala rigal, bħala don, ikunu kif ikunu, nilqgħuhom, naċċettawhom, inħobbuhom. Jekk nilqgħuhom bħala don u mhux bħala proprjetà, lit-tfal tagħna nkunu qed inqisuhom dejjem bħala persuni, ikunu kif ikunu, u jkunu min ikunu, u qatt bħala oġġett.

Għeżież ħuti, il-jum it-tajjeb!

Il-festa tal-Magħmudija ta’ Ġesù li qed niċċelebraw illum tagħti bidu għaż-Żmien Ordinarju: dal-perjodu tas-sena liturġika li jistedinna biex nimxu wara l-Mulej, nisimgħu Kelmtu u nimitaw il-ġesti tiegħu ta’ mħabba lejn il-proxxmu.

Infatti, hu b’hekk li nikkonfermaw u nġeddu l-Magħmudija tagħna, jiġfieri s-Sagrament li jagħmilna nsara, jeħlisna mid-dnub u jibdilna f’ulied Alla, bil-qawwa tal-Ispirtu tiegħu li jagħti l-ħajja.

L-Evanġelju li smajna, jirrakkonta kif tnissel das-sinjal effikaċi tal-grazzja. Meta talab lil Ġwanni jgħammdu fix-xmara Ġordan, Ġesù “ra l-Ispirtu ta’ Alla nieżel qisu ħamiema u ġej għal fuqu. U mis-smewwiet instama’ leħen il-Missier jgħid: “Dan hu Ibni l-għażiż” (v. 17). Dak il-ħin it-Trinita’ daħlet fl-istorja: bħalma l-Iben niżel fl-ilma tal-Ġordan, l-Ispirtu niżel fuqu u permezz tiegħu ingħata lilna bħala qawwa ta’ salvazzjoni..

Għeżież, Alla ma jogħqodx iħares lejn id-dinja mill-bogħod, bla ma jmiss ħajjtina, il-gwaj tagħna u l-istennija tagħna! Hu jiġi fostna bl-għerf tal-Verb tiegħu magħmul bniedem, u jwaħħadna ma’ proġett sorprendenti ta’ mħabba għall-umanità kollha kemm hi.

Għalhekk Ġwanni mistagħġeb isaqsi lil Ġesù: “Int tiġi għandi?” (v. 14) Iva, bil-qdusija tiegħu il-Mulej jitgħammed bħall-midinbin kollha biex jurina l-ħniena bla tarf ta’ Alla. L-Iben il-Waħdieni, li fih aħna lkoll aħwa, infatti, jiġi biex jaqdi mhux biex jiddomina, biex isalva mhux biex jikkundanna. Hu il-Kristu Redentur: jieħu fuqu dak kollu li hu tagħna, inkluz id-dnub, u jtina dak li hu tiegħu, jiġifieri l-grazzja ta’ ħajja ġdida u eterna.

Is-Sagrament tal-Magħmudija jikkonkretizza dil-ġrajja f’kull żmien u f’kull imkien, fina jintroduċi l-Knisja, li hi l-poplu t’Alla, magħmul minn irġiel u nisa minn kull nazzjon u kultura, imweldin mill-ġdid mill-Ispirtu tiegħu.

Għalhekk, niddedikaw dan il-jum biex inġeddu l-memorja ta’ dan id-don kbir li rċevejna, nimpenjaw ruħna li nkunu xhieda tiegħu bil-ferħ u l-koerenza. Propju llum għammidt xi trabi li saru ħutna ġodda fil-fidi: kemm hu sabiħ tiċċelebra l-imħabba t’Alla, li jsejħilna b’isimna u jeħlisna mid-deni, ilkoll flimkien, bħal familja waħda! L-ewwel wieħed fost is-Sagramenti hu sinjal sagru, li jakkumpanjana tul ħajjitna kollha. Fis-siegħat tad-dlam, il-Magħmudija hi dawl; fil-kunflitti tal-ħajja, il-Magħmudija hi rikonċiljazzjoni; fil-waqt tal-mewt, il-Magħmudija hi l-bieb tas-sema.

Nitolbu flimkien lill-Verġni Marija u nitolbuha twieżen kuljum il-fidi tagħna u l-missjoni tal-Knisja.

Wara l-Angelus:

Għeżież ħuti,

kif diġà għidt, dalgħodu – skont drawwa fil-festa tal-Magħmudija ta’ Ġesù – għammidt xi trabi, ulied xi dipendenti tas-Santa Sede. Issa rrid inbierek ukoll lit-tfal kollha li dal-ġranet irċevew jew se jirċievu l-Magħmudija, f’Ruma u fid-dinja kollha, u nqegħedhom taħt il-protezzjoni materna tal-Verġni Marija. Nitlob b’mod partikolari għal dawk it-tfal li twieldu f’kundizzjonijiet diffiċli, kemm minħabba raġunijiet ta’ saħħa kif ukoll minħabba perikli esterni. Jalla l-grazzja tal-Magħmudija, li tgħaqqadhom ilkoll mal-misteru paskwali ta’ Kristu, taħdem fihom u fil-familji tagħhom, b’mod effikaċi.

Ħsiebi jdur lejn dak li qed jiġri f’dal-ġranet fil-Lvant Nofsani, partikolarment fl-Iran u fis-Sirja, fejn tensjonijiet persistenti qed iġibu l-mewt ta’ ħafna persuni. Nawgura u nitlob li, bil-paċenjza tidħol il-kultura tad-djalogu u l-paċi fit-tfittxija għall-ġid komuni tas-soċjetà kollha kemm hi.

Fl-Ukrajna għadhom għaddejjin attakki partikolarment gravi fuq l-infrastrutturi tal-enerġija li qed jolqtu ħażin għall-aħħar lill-popolazzjoni ċivili, issa li qed tagħfas il-kesħa. Nitlob għal min qed isofri u nġedded l-appell biex tieqaf il-vjolenza u jkunu intensifikati l-isforzi biex tinġieb il-paċi.

U issa nsellem lilkom ilkoll, rumani u pellegrini preżenti llum fi Pjazza San Pietru. Grazzi, thank you, muchas gracias!

Insellem b’mod partikolari lill-grupp tal-iskola Everest, minn Madrid u l-assoċjazzjoni “Bambini Fratelli” minn Guadalajara, fil-Messiku: “Dejemos que los niños sueñen” (Ħallu lit-tfal jħolmu).

Nawguralkom ilkoll il-Ħadd it-tajjeb!

Miġjub għall-Malti minn Joe Huber għal Laikos

Ix-xena, nafuha tajjeb u f’dan il-post għandha sinifikat speċjali għax jekk tħarsu wara l-artal hemm l-iskultura straordinarja fl-irħam abjad sabiħ tal-Mazzuolo, il-magħmudija ta’ Ġesù minn Ġwanni l-Battista. Din hija l-festa divina li qed nagħmlu llum, il-festa proprju ta’ bejn iż-żewġ protagonisti f’dan il-katidral iddedikat lil San Ġwann il-Battista. Aħna ngħidulu l-Battista għax għammed lil Ġesù.

Ġwanni, it-tifel ta’ Żakkarija u Eliżabetta, li jgħammed lil Ġesù proprju kif jibda l-missjoni tiegħu l-Imgħallem tagħna. Ġwanni meta jara lil Ġesù jirrealizza min hu: “Mhux jien ngħammdek” (ara Mt 3:14) għax hu għarfu bħala l-ħaruf t’Alla li jneħħi d-dnubiet tad-dinja. Imma Ġesù jinsisti. Għaliex jinsisti? Għaliex b’dan il-ġest li hu jinżel fl-ilma tax-Xmara Ġordan, irid jgħidilna li sar wieħed minna biex ikun magħna. Għadda mill-proċess ta’ ndiema li nieda Ġwanni l-Battista u ried jissieħeb magħna fil-proċess ta’ tisfija.

Intom u tippreparaw għat-tieġ u ż-żwieġ tagħkom, nitlob fuqkom li l-imħabba tagħkom tkompli tikber u tissaffa. Tikber għax hemm bżonn li tħobbu ħafna lil xulxin. Jekk mhux hekk, agħmluli pjaċir, tiżżewġux. Imma hi u tissaffa, nawguralkom li tilqgħu lil xulxin kif intom, ma tippretendux li l-maħbub/a tagħkom huma perfetti għax intom m’intomx perfetti. Itgħallmu minn issa ħudu paċenzja b’xulxin. Il-paċenzja mhux mill-għada tat-tieġ imma minn issa. U jekk matul il-ġurnata jkollkom xi tgħidu titfixklux. Importanti li qabel torqdu tagħmlu paċi. Tħalluhiex tibqa’ għaddejja qisha kankru ġol-istonku għaliex anke l-imsaren igergru, aħseb u ara aħna bejnietna.

Mela l-parir tiegħi għalikom huwa dak il-parir li San Ġorġ Preca ta lit-tabib tiegħu. Din smajtha mingħand it-tabib Spiteri stess. Inħobb nirrepetiha u jekk smajtuha allura ħudu paċenzja bija wkoll. Imma t-tabib ta’ Dun Ġorġ Preca mar fuqu, Dun Ġorġ kien xjaħ u t-tabib kien għadu żagħżugħ u qallu ‘Sinjur, ħa niżżewweġ. Tagħtini parir?’ Dun Ġorġ qallu, ‘Mela, le. Ħa ngħidlek x’tagħmel, dott. Mur id-dar fejn se tgħixu u fuq il-blata ta’ kull bieb ikteb tliet kelmiet: paċenzja, paċenzja, paċenzja.’ U Dr Spiteri qalli, ‘Father, kelli bżonnha, ta. Kelli bżonnha.’ Imma qalili wara li kien ilu għexieren ta’ snin jgħix ma’ martu l-għażiża.

Il-bejta li se tagħmlu hija tagħkom, la tal-kunjata u lanqas tal-kunjatu.

Il-paċenzja xi tfisser? L-ewwel nett titgħallem tieħu paċenzja bik innifsek. Imbagħad bl-imħabba ta’ ħajtek, bl-ulied li Alla jogħġbu jibagħtilkom u bil-familji tagħkom. Nispera li jħallukom bil-kwiet. Patti chiari, amicizia lunga. (Ftehim ċar, ħbiberija fit-tul.) Il-bejta li se tagħmlu hija tagħkom, la tal-kunjata u lanqas tal-kunjatu. Jekk qegħdin hawn insellmulhom. Importanti wkoll li tagħtu ħin għal xulxin.

Fil-messaġġ li tajt għall-Milied ta’ din is-sena, lill-poplu għażiż tagħna, għidtlu xi ħaġa li tgħodd għalija wkoll. Nużaw ħafna mezzi ta’ komunikazzjoni. Dan l-imbierek smartphone li għandna f’idejna. Il-ħin kollu nħarsu lejh. Inħarsu naqra lejn xulxin. Il-ħarsa tagħkom lejn xulxin trid tkun ta’ vera mhux virtwali. Jekk għandek bżonn tgħidilha xi ħaġa naqra iebsa stennija ftit ħa tħares lejn wiċċek mhux tibagħtilha messaġġ ivenven u dik titherra minn ġewwa għax ma fehmitx x’ridt tgħid jew hu ma fehemx x’riedet tgħid.

Il-fedeltà tagħkom lejn xulxin tridu takkwistawha u tiġġieldu għaliha kuljum: il-fedeltà fil-ħsieb, fil-kliem u fejn timxi l-qalb. U jalla wkoll l-Mulej ikun parti mill-ħajja tagħkom

Importanti wkoll, din hija kelma ta’ San Pawl Appostlu Missierna f’kull aspett, fl-aspett ta’ komunikazzjoni, tal-imħabba tagħkom anke tal-intimità tagħkom. Iċċaħdux lil xulxin minn xulxin. Intom il-vokazzjoni tagħkom tkun li tkunu għal xulxin u li din l-għaqda ta’ bejnietkom il-Mulej iberikha bil-frott ukoll skont ir-rieda tiegħu u l-ġenerożità tagħkom.

Ippruvaw, issa ormaj naħseb ibbukkjatu kollox, teżaġerawx fil-ħajja. Kollox bil-kalma. Kulħadd jimxi bil-pass tiegħu. Jiena ċkejken. Inutli ntellaq ma’ wieħed fih sitt piedi għax jgħaddini żgur. Nimxi bil-pass tiegħi. U allura tajjeb ukoll intom tifirħu b’xulxin mingħajr ma tħares lejn ix-xellug jew il-lemin. Itgħallem ifraħ b’dik il-persuna li trid tkun l-għaxqa ta’ ħajtek.

Illum il-Mulej isemma’ leħnu fuq ibnu u jgħid din il-kelma sabiħa li nawguralkom tkunu tistgħu tgħiduha fuq xulxin il-jiem kollha ta’ ħajjitkom. “Dan hu ibni l-għażiż, li fih sibt l-għaxqa tiegħi” (Mt 17:5). U jalla intom u tħarsu lejn xulxin tkunu tistgħu tgħidu: ‘Fih/a sibt l-għaxqa ta’ ħajti.’ Il-Mulej jagħtikom ħafna paċi, ħafna sliem. Il-Mulej jiddefendikom fil-mumenti ibsin għax ma jonqsu qatt. Nidħaq bikom jekk ngħidilkom li l-ħajja faċli. Mhu veru xejn. Ser ikun hemm il-mumenti diffiċli. Imma ma naqtgħux qalbna.

Il-Mulej illum ifakkarna “Jiena dak li nsalvak, jiena dak li jiena miegħek” (ara Atti 10:38). Allura intom wkoll tridu ssalvaw lil xulxin bl-imħabba ta’ bejnietkom u billi tkunu preżenti għal xulxin. U meta tiġi t-tentazzjoni li l-borma tal-ġara tfuħ iżjed, għalaq imnifsejk mhux ixxomm iżjed. Għaliex il-fedeltà tagħkom lejn xulxin (għal kulħadd qed ngħid) tridu takkwistawha u tiġġieldu għaliha kuljum: il-fedeltà fil-ħsieb, fil-kliem u fejn timxi l-qalb. U jalla wkoll l-Mulej ikun parti mill-ħajja tagħkom.

L-aħħar ħsieb tiegħi u l-awgurju llum: illum ġejtu hawn, nirringrazzjakom tal-preżenza sabiħa tagħkom. Nawguralkom ukoll li tippreparaw tajjeb għaż-żwieġ Nisrani li għażiltu, anke bis-sagrament tal-qrar u t-tqarbina mqaddsa. Imma mbagħad qisu li l-quddiesa ta’ nhar ta’ Ħadd tkun parti mir-ritmu ta’ ħajjitkom, li t-talba ċkejkna ta’ kuljum, imqar Sliema u Qaddisa flimkien, tkun parti mir-ritmu ta’ ħajjitkom, biex meta l-Mulej jberikkom bi wliedkom, ikollkom mhux biss imħabba umana x’tagħtuhom, imma fidi sabiħa li tagħmilhom parti mill-familja tal-Mulej.

✠ Charles Jude Scicluna
Arċisqof ta’ Malta

Qari tal-quddiesa
Qari I: Iż 42:1-4,6-7
Salm: 28 (29):1a-2,3aċ-4,3b u 9b-10
Qari II: Atti 10:34-38
L-Evanġelju: Mt 3:13-17

Aktar ritratti

Madankollu, it-tradizzjoni tal-Knisja tibni fuq ir-rakkont bibliku. Skont tradizzjoni antika, il-Maġi kienu tlieta u kienu jisimhom Melkjor, Gaspar u Baltassar, u kienu jirrappreżentaw it-tliet kontinenti magħrufa tad-dinja antika, L-Ewropa, l-Ażja u l-Afrika. L-esperjenza tagħhom ma’ Ġesù bidlithom profondament: jingħad li kkonvertew għall-Kristjaneżmu u li aktar tard xehdu għall-fidi tagħhom sal-martirju.

It-tradizzjoni tkompli li r-relikwi tal-Maġi ġew skoperti fis-seklu erbgħa minn Santa Elena hekk kif kienu magħrufa mill-ewwel Insara u ttieħdu fil-Belt Nisranija l-ġdida ta’ Kostantinopli.

Aktar tard ġew trasferiti għal Milan u fl-1164 waslu Cologne, fil-Ġermanja, fejn jinsabu sal-lum fis-Santwarju tat-Tliet Slaten ġewwa l-Katedral. Monasteru Ortodoss tal-Muntanja Athos jiddikjara li għandu l-istess rigali li l-Maġi offrew lil Ġesù: id-deheb, l-inċens u l-mirra.

X’qal l-Arċisqof waqt l-Quddiesa fis-solennità tal-Epifanija tal-Mulej bl-għoti tal-Ministeru tal-Lettorat lil tliet seminaristi.

Għadna kemm ilqajna lil dawn iż-żgħażagħ li qed juru d-disponibbiltà tagħhom biex ikunu istitwiti, magħżula għall-ministeru tal-Lettorat, jiġifieri dawk l-persuni li fil-miġemgħa tagħna jħabbru l-Kelma t’Alla. Hemm vers sabiħ li jgħaqqad dak li se nagħmlu minn hawn u ftit ieħor, mal-festa sabiħa li qed niċċelebraw illum. Fis-salm hemm miktub: “musbieħ għal riġlejja l-Kelma tiegħek” (Salm 119:105).

Jiena nawguralkom f’din l-festa tal-Epifanija – festa tad-dawl, festa mmexxija mill-Kewkba, għajn ta’ dawl, li l-Kelma t’Alla – għeżież Marvic, Daniel u Luke – tkun il-musbieħ għal riġlejkom. Riġlejn li jinterpretaw dak li jgħid il-moħħ u l-qalb. Ir-riġlejn huma s-sinjal tal-appostolat. Intom qegħdin tingħataw li twasslu l-Evanġelju fit-truf kollha tad-dinja.

Illum nisimgħu lill-Profeta Iżaija jgħidilna: “Il-poplu li kien miexi fid-dlam, ra dawl kbir” (Iż 9:1) jolqotni ħafna dan il-vers għax fil-liturġija jerġa’ jitfakkar ukoll l-evanġelizzazzjoni ta’ pajjiżna fil-festa tan-Nawfraġju ta’ Missierna San Pawl: “Il-poplu li kien miexi fid-dlam ra dawl kbir” (Iż 9:2-3). U f’din il-festa ta’ dawl, imwieżna mhux biss mill-kewkba imma wkoll mill-Kelma t’Alla, li tindika lil Bethlehem bħala dik mhux l-iċken fost l-ibliet l-kbar ta’ Ġuda (ara Mt 2:6), f’din il-festa nitlob għalikom biex il-Kelma t’Alla tkun musbieħ għal riġlejkom tul ħajjitkom kollha.

Biex iseħħ dan fil-qalb tagħkom hemm bżonn umiltà kbira. Imma wkoll għamlu ħiltikom biex tifhmu aktar il-Kelma t’Alla, ixxenqu biex tistudjawha fil-profond, skont il-kapaċitajiet li tagħkom Alla, ħalli tkunu tistgħu taqsmu kelma bnina għall-poplu t’Alla. Itolbu li tgħixu skont dak li taqraw, ifhmu li qed ixxandru aħbar tajba u li intom, ħajjitkom, tridu tkunu aħbar tajba għall-poplu tagħna.

Għadna wkoll kemm smajna t-tħabbira tad-data tal-Għid il-Kbir għax il-festa tal-lum tħares ukoll lejn l-Għid. Illum il-Mulej – tarbija ċkejkna ġo Betlehem – wera lilu nnifsu lill-ġnus li ġew mill-bogħod.  Hu rċieva r-rigali tad-deheb għaliex huwa sultan, tal-inċens għax hu l-Iben t’Alla, u tal-mirra li se tintuża fid-difna tiegħu. (Id-difna hija dik l-ħabba tal-qamħ li taqa’ fl-art u tmut biex ma tibqax weħidha imma biex tagħmel ħafna frott (ara Ġw 12:24).)

Ejjew nitolbu llum ukoll, aħna u niċċelebraw fil-liturġija l-magħmudija tal-Mulej u t-tieġ f’Kana tal-Galilea, fejn “wera l-glorja tiegħu” (Ġw 2:11) lid-dixxipli tiegħu, li intom tħossukom ulied maħbubin mill-Mulej, bħala ulied għeżież li fikom il-Missier isib il-għaxqa tiegħu. Ukoll, tkunu dawk l-ħbieb tal-għarus li bħal San Ġwann il-Battista tgħidu: “Jeħtieġ jikber hu u niċkien jiena” (Ġw 3:30).

Nawgralkom ħafna mill-qalb!

✠ Charles Jude Scicluna     Arċisqof ta’ Malta

Qari tal-quddiesa Qari I: Iż 60:1-6 Salm: 71 (72):1-2,7-8,10-11,12-13 Qari II: Ef 3:2-3a,5-6 L-Evanġelju: Mt 2:1-12

Alla, fil-providenza u l-ħniena tiegħu, ħaseb biex f’dawk l-aħħar żminijiet jgħin lid-dinja ħalli ma tibqax tintilef, u għalhekk ried isalva lill-ġnus kollha permezz ta’ Kristu.

Fl-imgħoddi huwa wiegħed lill-patrijarka qaddis Abraham li kellu jkun il-missier tal-kotra bla qies ta’ dawn il-ġnus, mhux bis-saħħa tat-tnissil skont il-ġisem imma skont il-fidi, u għalhekk xebbah lil nislu mal-kwiekeb bla għadd biex il-missier tal-ġnus kollha jqiegħed it-tama tiegħu f’ulied mhux tal-art imma tas-sema.

Ħa jidħlu mela l-ġnus kollha fil-familja tal-patrijarka, biex il-barka tan-nisel ta’ Abraham jiksbuha wlied il-wegħda, ladarba wlied il-ġisem ċaħħdu lilhom infushom minnha. U fil-persuna tat-tliet maġi, ħa jqimu l-popli kollha lil dak li għamel il-ħolqien; ikun magħruf Alla mhux fil-Lhudija biss, imma fl-art kollha, biex ikun jista’ jingħad kullimkien li kbir hu ismu f’Iżrael.

Għeżież, fid-dawl ta’ dawn il-misteri tal-grazzja ta’ Alla, niċċelebraw b’ferħ spiritwali l-jum tat-twelid ġdid tagħna u l-ewwel sejħa tal-ġnus, u nroddu ħajr lil Alla l-ħanin li, kif jgħid l-Appostlu, għamilna denji li nissieħbu fil-wirt tal-qaddisin fis-saltna tad-dawl; hu ħelisna mill-ħakma tad-dlam, u daħħalna fis-saltna ta’ Ibnu l-għażiż; għax, kif ħabbar Iżaija, il-poplu li kien miexi fid-dlam ra dawl kbir, in-nies li joqogħdu f’art id-dlam dawl kbir idda fuqhom. Għal dawn in-nies il-Mulej qal ukoll: Lilek għad isejħu l-ġnus li ma għarfukx, u għandek jiġu l-popli li ma kinux jafu bik.

Dan hu l-jum li Abraham rah u feraħ, meta sar jaf li wliedu fil-fidi kellhom jitbierku fin-nisel tiegħu, li hu Kristu, u lemaħhom minn qabel, meta emmen li kien se jsir missier il-ġnus kollha, u filwaqt li sebbaħ lil Alla, żamm bis-sħiħ li min kien għamillu l-wegħda kien qawwi biżżejjed biex iżomm kelmtu.

Dan hu l-jum li David għanna fis-salmi, meta qal: Il-ġnus kollha, li int għamilt, jiġu jinxteħtu quddiemek, u jsebbħu ismek, Sidi; u wkoll : Għarraf il-Mulej is-salvazzjoni tiegħu, f’għajnejn il-ġnus wera l-ġustizzja tiegħu.

Nafu li l-Mulej beda jagħmel dan minn dakinhar li l-maġi telqu mill-pajjiżi mbiegħda tagħhom, imxew wara l-kewkba u marru biex jagħrfu lis-Sultan tas-sema u l-art u jadurawh. Dawn il-qaddejja ta’ Alla jistednuna nagħmlu bħalhom, biex aħna wkoll, kemm nistgħu, naqdu lill-grazzja ta’ Alla li ssejjaħ lil kulħadd għand Kristu.

Għeżież, huwa dmir tagħkom ilkoll li tgħinu lil xulxin f’dan it-tħabrik, biex tkunu tiddu bħala wlied id-dawl fis-saltna ta’ Alla li fiha naslu bis-saħħa tal-fidi vera u tal-għemejjel tajba tagħna, permezz ta’ Sidna Ġesù Kristu, li jgħix u jsaltan ma’ Alla l-Missier flimkien mal-Ispirtu s-Santu għal dejjem ta’ dejjem. Amen

L-Għaqda ġiet imwaqqfa fit-Tarzna fis-7 ta’ Ġunju 1926. Kien bidu ċkejken fejn intefgħet iż-żerriegħa li maż-żmien kibret f’siġra li tat u għadha tagħti ħafna frott.

Illum, għall-grazzja t’Alla, l-għadd tal-membri ħajjin jaqbeż it-tlett elef ruħ, imxerda mal-ibliet u l-irħula kollha ta’ dawn il-gżejjer kif ukoll f’diversi artijiet oħra barra minn xtutna.

Kollox beda minn ċertu Ġużeppi Briffa, ħaddied fid-Dockyard. Dan ġie mqanqal mill-ħsieb li jibda jaghmel quddiesa darba fix-xahar b’suffraġju għall-erwieħ tal-purgatorju b’mod speċjali għall-ħbieb u mejtin. Huwa wettaq dan il-ħolma proprju fix-xahar tal-Qalb ta’ Ġesù tal-1926.

Minn dak in-nhar ’il quddiem, kull xahar kien jiġbor xi ħaġa żgħira tal-flus mingħand sħabu l-ħaddiema u b’dak li jiġbor jagħmel quddiesa. Aktar ma beda jgħaddi żmien din l-ideja kompliet tintlaqa’ tajjeb u kienu bosta dawk li bdew jagħtu l-offerta tagħhom, għaldaqstant xi drabi kien ikun hemm flus għal aktar minn quddiesa waħda fix-xahar.

Dan wassal biex, maż-żmien, in-numru tal-imseħbin kiber ġmielu u għalhekk inħass il-bżonn li jitwaqqaf kumitat biex jikkoordina l-ħidma. Bdew jinħolqu wkoll għadd ta’ kolletturi u promoturi f’diversi bliet u rħula, b’ħeġġa u b’perseveranza, bdew jaħdmu volontarjament sabiex din l-opra tixtered dejjem aktar.

Barra minn hekk, sa minn kmieni twaqqfu wkoll fondazzjonijiet ta’ quddies f’għadd ta’ knejjes differenti. Minn dakinhar sal-lum, l-Għaqda qatt ma ħarset lura u baqgħet tqassam elemożini biex isiru quddies u tqassim ta’ għotjiet ta’ karità, kemm f’dawn il-gżejjer kif ukoll fl-artijiet tal-missjoni.

San Ġorġ Preca u l-Għaqda

Minkejja li kollox beda fost il-ħaddiema tat-Tarzna, ma nistgħux ma nsemmux ir-rabta kbira li din l-Għaqda kellha sa mill-bidu tagħha ma’ San Ġorġ Preca.

Meta twaqqfet l-Għaqda tagħna, dan il-qaddis kien ilu kważi 46 sena u kif kienu jgħidu l-ewlenin membri, meta sema’ b’din l-inizjattiva, huwa qal li din kienet ħidma meħtieġa u f’waqtha.

San Ġorġ Preca kien jemmen bis-sħiħ fil-qawwa tat-talb u fis-suffraġju għall-erwieħ, u din il-konvinzjoni spiritwali kompliet issaħħaħ u tgħin lill-Għaqda tikber u tissaħħaħ tul is-snin.

L-Isqof wara l-pubblikazzjoni ta’ dan il-ktieb fl-ewwel snin tal-Għaqda kien li l-membri jaqraw paġna kuljum, b’mod speċjali matul ix-xahar ta’ Novembru. Dawn il-ħsibijiet profondi maqsuma fi tletin paġna juru kemm Dun Ġorġ kien immedjat dwar il-Purgatorju.

Fil-quddiesa għall-membri, li fiha l-imghoddi Dun Ġorġ kien iqaddes ta’ kull sena fix-xahar ta’ Novembru, kien jispiċċa dejjem billi b’ċerta serjetà li turi l-fidi kbira tiegħu, kien jgħid li dawk preżenti:

“Nistgħu nimmaġinaw li qegħdin fuq il-bokka tal-Purgatorju u nisimgħu t-tnehid tal-erwieħ jgħajtu f’widnejna: Għażiż ħuna, hawn qegħdin u aħna għadna għall-mistrieħ tagħna, għax int ukoll għad tkun f’dan l-istess tribunal li aħna diġà dħalna fih. O, x’għidizzju jiebes! O, xi ħruġja fil-kastig!”

Konklużjoni

Illum, hekk kif qegħdin infakkru l-ewwel mitt sena ta’ ħidma b’risq l-erwieħ tal-Purgatorju, ma nistgħux ma nħossux gratitudni kbira lejn Alla l-Imbierek u lejn il-Madonna tal-Karmnu, li taħt il-patroċinju tagħha l-Għaqda għażlet li tqiegħed ruħha.

Minkejja li għadda ħafna żmien, għadhom attwali ħafna l-kelmiet tal-Qaddej t’Alla Mons. Isqof Emmanuel Galea, li meta bierek l-Għaqda tagħna qal:

“Filwaqt li nixtequ li tkompli tikber fid-devozzjoni sabiħa lejn l-erwieħ tal-Purgatorju, inħeġġu mill-qalb lill-imseħbin kollha tal-Għaqda.”

L-isfida tal-Għaqda tagħna llum hija dik li permezz tal-membri tagħha tkompli tinfirex u tissaħħaħ din il-wirt spiritwali sabiħ li jfanna li tkebbes mitt sena ilu u ma jintifiex. B’hekk inżommu ħajja l-missjoni ewlenija tal-Għaqda: li nitolbu għall-erwieħ tal-Purgatorju u li nkunu xhieda tat-twemmin fil-ħajja ta’ dejjem.

Kitba: Ġorġ Agius, mill-Kalendarju 2026 li jitqassam kull sena mil-Għaqda.

Tixtieq tidħol Membru?

L-Arċisqof Pawlu Cremona ukoll kien membru ta’ din l-Għaqda.
Jekk trid tkun parti minn din l-Għaqda jew tkun sostenitur tagħha, agħżel minn dawn l-iskemi:

Skema 1 - Biex tikteb il-Mejtin

Din l-iskema hija maħsuba biex familjari jew ħbieb jiktbu lil xi ħadd għażiż għalihom li jkun miet. Permezz ta’ din il-kitba, il-mejjet jibbenefika mill-Quddies, it-talb u l-opri tal-karità li jsiru mill-Għaqda b’suffraġju għal ruħu. Il-ħlas għal din l-iskema huwa ta’ €5 jew aktar, b’mod liberu, għal kull persuna miktuba.

Skema 2 – Membru għal ħajtek u wara mewtek

Din l-iskema hija maħsuba għal kull min jixtieq jissieħeb bħala membru f’din l-Għaqda għal għomru u wara mewtu. Il-membri, barra li huma stess huma mħeġġa jitlobu għall-erwieħ tal-Purgatorju, jibbenefikaw mill-Quddies, it-talb u l-opri tal-karità li jsiru mill-Għaqda b’mod regolari. Wara l-mewt tagħhom, il-Għaqda tieħu ħsieb li jsiru tliet quddisiet b’suffraġju għal ruħhom. Il-ħlas għal din l-iskema huwa ta’ €25 jew aktar, b’mod liberu.

Skema 3 -Membri għal sena

Din l-iskema hija maħsuba għal kull min jixtieq jissieħeb bħala membru f’din l-Għaqda għal sena. Il-membri, barra li huma stess huma mħeġġa jitlobu għall-erwieħ tal-Purgatorju, jibbenefikaw mill-Quddies, it-talb u l-opri tal-karità li jsiru mill-Għaqda b’mod regolari. Il-ħlas għal din l-iskema huwa ta’ €2.50 fis-sena.

Skema 4 – Membri Sostenituri

Din l-iskema hija maħsuba għal min jixtieq ikun membru sostenitur. Min jixtieq jidħol f’din l-iskema jista’ jagħti offerta ta’ €30, €50, €100 jew aktar, b’mod liberu, biex ikun qed jgħin b’mod sostanzjali l-ħidma tal-Għaqda.

Permezz ta’ dawn l-offerti, tkun qed tgħin lill-Għaqda tagħmel quddies u tgħin kawżi ġusti b’suffraġju għall-erwieħ tal-Purgatorju u bit-talb għall-membri ħajjin.

Min jixtieq jibqa’ anonimu jista’ jagħmel dan.

Kif tkun Parti minn Skema:

Jekk tixtieq tkun parti minn xi skema, kull ma għandek tagħmel hu li tibgħat l-isem tal-iskema, l-offerta u l-intenzjoni tiegħek lid-direzzjoni, flimkien mal-isem, telephone jew mobile number u l-indirizz tiegħek.

Ħlasijiet:

Il-ħlas jista’ jsir b’ċekk, postal order, kif ukoll permezz ta’ Revolut jew BOV Mobile to Mobile payment fuq in-numru 79052050.

Indirizz: Segretarju Ġorġ Agius, Block 12, Flat 2, Triq San Lawrenz, il-Birgu, BRG1382

Contact Number għal aktar informazzjoni: 79052050

Talba li tingħad kuljum mill-Membri

Alla Missier il-ħniena, noffrilek il-Pjagi Divini ta’ Sidna Ġesù Kristu għall-erwieħ tal-Purgatorju, biex tithollas denjament għad-dejn tagħhom u teħlishom fit-Tgawdija Eterna Tiegħek. Ammen.

Il-Kumitat tal-Għaqda tal-Erwieħ tal-Purgatorju

Direttur Spiritwali: Rev. Mons. Paul Raggio
Segretarju: Ġorġ Agius
Membri:
Mario Alessandro
Paul Borg
Vince Lia
Jesmond Mifsud
Awditur: Martin Abela

Għal xi wħud (forsi xettiċi fil-fidi) dawn iż-żgħażagħ jistgħu jidhru li qegħdin jaħlu ħajjithom. Imma x'hemm isbaħ milli tagħti ħajtek għal Alla li ħalqek? X'hemm isbaħ milli tagħti ħajtek għall-formazzjoni spiritwali taż-żgħar u kbar? Kif tgħid l-Iskrittura: "“Kemm huma sbieħ ir-riġlejn ta’ min iħabbar il-bxara, ta’ min ixandar is-sliem, ta’ min iħabbar ir-risq, ta’ min ixandar is-salvazzjoni!"

Nitolbu għalihom ħa jibqgħu fidili għas-sejħa tagħhom minkejja l-mewġ li se jħabbat bil-qilla kontra tagħhom: Jake Bezzina min-Naxxar, Joseph Mizzi mill-Għasri, David Abela mis-Siġġiewi, Wayne Borg mis-Swatar u Gilbert Borg minn Ħaż-Żebbuġ.

Agħfas Subscribe biex tibqa’ tiġi Aġġornat b’Aħbarjiet mill-Knisja f’Malta u Madwar d-Dinja

Talba:

Grazzi Sinjur Alla u Aħfirli Sinjur Alla. San Ġorġ Preca, Itlob Għalihom u Għalina.

Sorsi: Adattament tal-Kitba ta’ Robert Alosio u Ritratti minn Facebook

Lara, li twieldet f’Marzu, żiedet il-popolazzjoni tal-lokalità għal madwar 20 resident. Il-wasla tagħha ġabet tama ġdida f’komunità li ilha tbati minn tnaqqis qawwi fil-popolazzjoni.

Dan il-każ jirrifletti kriżi nazzjonali usa’, magħrufa bħala x-“xitwa demografika” tal-Italja. Fl-2024, in-numru ta’ twelid laħaq livell rekord baxx, b’rata ta’ fertilità fost l-inqas fl-Unjoni Ewropea. Minkejja inċentivi finanzjarji mill-gvern, din tibqa’ realtà persistenti.

Anke Malta qed taffaċċja sfida simili. Skont data reċenti tal-UE, Malta għandha l-inqas rata ta’ twelid fl-Unjoni Ewropea.

Meta r-raġel u l-mara jiżżewġu jsiru ġisem wieħed u meta jkollhom l-ulied isiru ko-kreaturi ma’ Alla. Il-ħajja ta’ kull bniedem hija rigal, u l-istess tarbija ġdida, hija rigal mingħand Alla u parteċipazzjoni tal-bniedem, mingħajr ma jistħoqqlu, fil-misteru tal-ħolqien.

Hekk kif għadna qed niċċelebraw it-Twelid ta’ Ġesù Bambin:

Ejjew nitolbu għal pajjiżna biex jibqa’ jgħożż il-ħajja umana f’kull stadju tagħha, mill-bidu sat-tmiem naturali tagħha.

Nitolbu wkoll għal koppji biex jagħrfu s-sabiħ tal-familja, għal ġenituri biex irabbu lil uliedhom fl-imħabba ta’ Alla u għal dawk kollha li jixtiequ jkollhom it-tfal biex, bl-interċessjoni ta’ Sant’ Anna, il-padruna tat-trabi fil-ġuf li kellha lil Marija wara snin twal ħafna ma jistax ikollha tfal, biex jaslu biex jaraw il-frott tal-imħabba tajba ta’ bejniethom.

Nerħu kollox f’idejk, Mulej Ġesù. Int biss is-Sid tal-Ħolqien kollu.

Int biss taf x’inhu l-aħjar għalina.

Ħu ħsiebna Int.

“Fil-bidu kien il-Verb, u l-Verb kien ma’ Alla, u l-Verb kien Alla.“

L-Evanġelju tal-lum jiftħilna perspettiva profonda: “Fil-bidu kien il-Verb.” Dawn huma kliem simili ħafna tal-kliem li bihom tibda l-Bibbja, meta titkellem dwar il-ħolqien: “Fil-bidu Alla ħalaq is-sema u l-art” (Ġenesi 1:1). Illum nisimgħu li l-persuna ta’ dik it-Tarbija li qed nikkontemplaw fil-presepju kienet teżisti qabel kollox: qabel id-dinja, qabel iż-żmien, qabel kull ħajja.

Il-persuna ta’ Ġesù ma bdietx teżisti fil-Milied; il-Milied hu l-mument meta l-Ħajja eterna tidħol fl-istorja tagħna. Imma l-Evanġelju ma jaħbix id-drama ta’ din il-ġrajja: id-dawl ġie fid-dinja, iżda ħafna għażlu d-dlam; il-Verb ġie għand niesu, iżda niesu ma laqgħuhx. Din mhux biss storja tal-imgħoddi. Hi realtà li tmiss ukoll il-ħajja tagħna, għax id-dnub u l-ħażen jibqgħu jippruvaw jaħlqu l-bieb quddiem Alla. Għalhekk il-Milied jitlob minna għassa, attenzjoni, u qalb miftuħa.

Bil-kelma Verb, San Ġwann jitkellem kemm mal-Lhud li kienu jemnu fil-Kelma ħajja ta’ Alla, kif ukoll mal-Griegi li kienu jfittxu t-tifsira u r-raġuni tal-ħajja. Xi wħud ifittxu lil Alla bil-qalb, oħrajn bir-raġuni. Il-Milied jgħidilna li Ġesù jilħaq it-tnejn: hu l-Verb li jitkellem mal-qalb u jagħti sens lir-raġuni. U dan il-Verb, li jilħaq il-qalb u r-raġuni, ma baqax idea: sar laħam u għammar fostna.

“U l-Verb sar bniedem u għammar fostna”

Bil-Malti nużaw “bniedem” iżda bl-oriġinal tintuża kelma li tfisser “laħam”: nitilfu l-qawwa drammatika tal-kelma Griega u wkoll is-sens ta’ fraġilità u vulnerabbiltà.

Alla ma beżax mid-dgħufija tagħna; daħal fiha. Il-Verb sar laħam: Alla daħal fil-fraġilità tagħna, mhux biex jevitaha imma biex isalvaha. Meta xi ħadd iħobb tassew, ma jibqax jitkellem mill-bogħod. Jiġi fil-qrib tal-ieħor, jaqsam id-diffikultajiet tiegħu. Hekk għamel Alla: sar wieħed minna, biex ikun qrib tagħna fil-ħajja tagħna.

U mhux biss: l-Evanġelju jgħid li ġie jgħammar fostna. Ma ġiex bħala viżitatur li jgħaddi u jitlaq, imma bħala wieħed li jibqa’. Jixhed jaqsam magħna l-ferħ u n-niket, it-tamiet u l-biżgħat, il-ħolm u d-diżappunti tagħna. Il-Milied allura mhuwiex biss tifkira sabiħa imma stedina konkreta. Jistedinna nħallu lil Alla jidħol f’ħajjitna kif inhi. Bla biza’ nistednuh jiġi jgħandna u fina biex jara l-ġrieħi tagħna u jfiejjaqhom. Dan hu l-misteru kbir u sabiħ tal-Milied.

Alla ma jibżax minn dak li nibżgħu minnu aħna; ejjew bl-eżempju u bl-għajnuna tiegħu, nieqfu ninħbew minna nfusna u nibdew naffaccjaw ir-realtà tagħna kif tassew hi.

Għeżież, illum twieled is-Salvatur tagħna; ejjew nifirħu. Mhuwiex sewwa li wieħed isewwed qalbu fejn hi mwielda l-ħajja, dik il-ħajja li qerdet il-biża’ tal-mewt u mlietna bl-hena tal-ħajja ta’ dejjem.

Ħadd mhu se jkun imċaħħad minn sehmu f’din ix-xrara ta’ hena li għalih kulħadd xorta waħda hu msejjaħ: għax Sidna, li qered id-dnub u l-mewt, bħalma ’l ħadd minna ma sab nieqes mill-ħtija hekk ġie biex jeħles lil kulħadd. Jithenna l-qaddis għax wasal għall-premju. Jifraħ il-midneb għax hu mistieden għall-maħfra. Jieħu r-ruħ il-pagan għax isejjaħ għall-ħajja.

Għax l-Iben ta’ Alla, fil-milja taż-żminijiet, kif fassal Alla fil-pjan għoli tiegħu li ħadd ma jista’ jiflih, sar bniedem biex jerġa’ jħabbeb il-bnedmin mal-ħallieq tagħhom, u hekk ix-xitan, li bih daħlet il-mewt fid-dinja, jintrebaħ bis-saħħa ta’ dik l-istess natura li biha hu kien ħareġ rebbieħ.

Kien għalhekk li meta twieled il-Mulej l-anġli għannew Glorja ’l Alla fl-ogħla tas-smewwiet, u ħabbru sliem fl-art lill-bnedmin ta’ rieda tajba. Għax huma raw lil Ġerusalemm tas-sema tibda tinbena mill-ġnus kollha tal-art. U jekk jifirħu daqshekk l-anġli, fil-kobor kollu tagħhom, kemm għandhom għax jithennew il-bnedmin, fiċ-ċokon tagħhom, quddiem għemil bħal dan tat-tjieba ta’ Alla, għemil li ħadd ma jista’ jfissru bil-kliem!

Niżżu ħajr ’l Alla, mela, għeżież tiegħi, permezz ta’ Ibnu, fl-Ispirtu s-Santu, għax fil-qalb l-aktar ħanina tiegħu, li biha ħabbna, huwa ħenn għalina; u, meta konna mejta minħabba dnubietna, tana ħajja ġdida flimkien ma’ Kristu, biex bih inkunu ħolqien ġdid, xogħol imsawwar mill-ġdid.

Ninżgħu l-bniedem il-qadim bl-għemejjel tiegħu; u, ladarba issa ksibna sehem fit-tnissil ta’ Kristu, ejjew niċħdu l-għemejjel tal-ġisem.

Agħraf, o nisrani, l-kobor tiegħek; int, li sseħibt ma’ Alla fin-natura tiegħu, la terġax taqa’ fil-post baxx ta’ dari b’ħajja mhix xierqa. Ftakar ta’ liema ras u ġisem int membru. Żomm f’moħħok li inti nqtajt minn taħt is-setgħa tad-dlamijiet u għaddejt fid-dawl u s-saltna ta’ Alla.

Bis-sagrament tal-magħmudija sirt tempju tal-Ispirtu s-Santu; qis li Spirtu hekk qaddis li jgħammar fik ma tkeċċihx minnek b’għemejjel ħżiena u tintelaq mill-ġdid taħt il-jasar tax-xitan: għax il-ħlas tal-fidwa tiegħek hu d-demm ta’ Kristu.

Awguri għal Milied Qaddis minn Kattoliċi Maltin 🩵

“U (Ġesù) ħa l-ġisem bis-setgħa tal-Ispirtu s-Santu minn Marija Verġni u sar bniedem.”

Din l-istqarrija hija parti mill-Kredu. L-ewwel parti ta’ dan il-Kredu nkitbet waqt il-Konċilju ta’ Niċea li seħħ 1700 sena ilu.

X’inhu Konċilju?

Konċilju huwa meta jinġabru l-Isqfijiet ta’ madwar id-dinja, f’unità mal-Papa, u flimkien iwieġbu għad-domandi, l-ereżiji jew l-isfidi tal-Knisja tal-mument. L-aħħar Konċilju li sar kien dak magħruf bħala l-Konċilju Vatikan II, li ġie fi tmiemu 60 sena ilu, fl-1965. Waqt il-Konċilju, l-Isqfijiet għandhom l-awtorità li jgħallmu b’awtorità dak li huwa tajjeb u dak li huwa ħażin. L-ewwel konċilju ta’ din ix-xorta nsibuh fl-Atti tal-Appostli u sar mill-Appostli stess, l-ewwel Isqfijiet, ġewwa Ġerusalemm.

X’Ġara fil-Konċilju ta’ Niċeja?

Din is-sena qegħdin infakkru ukoll l-1700 sena minn mindu ġie kkonvokat il-Konċilju ta’ Niċeja. Dan huwa il-Konċilju li fih beda jinkiteb il-Kredu li ngħidu fil-Knisja kull nhar ta’ Ħadd.

Il-Konċilju ta’ Niċeja tlaqqa’ fis-sena 325 WK mill-Imperatur Kostantinu biex jindirizza l-ereżija ta’ Arju, li fi kliem sempliċi kien jistqarr li Kristu mhuwiex Alla.

B’riżultat ta’ dan il-Konċilju, Arju u dawk kollha li kienu jaħsbuha bħalu ġew skomunikati, u ġie fformulat il-Kredu li, bl-aktar mod ċar, jafferma li Ġesù huwa persuna waħda, imma għandu żewġ naturi: dik ta’ Alla kif ukoll dik ta’ bniedem. Jiġifieri, Ġesù huwa Veru Alla u Veru Bniedem.

Dan il-Kredu beda jingħad fil-knejjes kollha ta’ madwar id-dinja sal-lum il-ġurnata, u kien hemm xi żidiet oħra miegħu aktar tard fil-Konċilju Ekumeniku ta’ Kostantinopli, fis-sena 381 WK, biex jinkludi wkoll xi veritajiet dwar l-Ispirtu s-Santu.

X’jgħidilna dan il-Vers?

Il-vers mill-Kredu: “Ġie konċeput mill-Ispirtu s-Santu u twieled minn Marija Verġni” jixħet dawl fuq l-Inkarnazzjoni ta’ Ġesù.

Jenfasizza li Ġesù, filwaqt li huwa veru Alla, huwa wkoll veru bniedem. Ġesu mhuwiex nofs Alla u nofs bniedem, jew taħlita tat-tnejn flimkien - Ġesù huwa veru Alla u veru bniedem.

L-enfasi fuq il-konċepiment mill-Ispirtu s-Santu tfakkarna fil-kliem li qal l-Anġlu Gabrijel lil Marija nhar it-Tħabbira, meta qalilha: “L-Ispirtu s-Santu jiġi fuqek, u l-qawwa ta' l-Għoli tixħet id-dell tagħha fuqek. U għalhekk dak li jitwieled minnek ikun qaddis, u jissejjaħ Bin Alla.” (Luqa 1:35)

Il-vers: “Ġie konċeput mill-Ispirtu s-Santu u twieled minn Marija Verġni” jenfasizza wkoll li Ġesù twieled minn Marija Verġni.

Marija hija Omm Alla, filwaqt li baqgħet verġni qabel, waqt u wara t-twelid ta’ Ġesù.
Hawn niftakru f’dak li qal l-Anġlu lil San Ġużepp fil-ħolma li kellu: "Ġużeppi, bin David, xejn la tibża' tieħu għandek lil martek Marija, għax dak li tnissel fiha ġej mill-Ispirtu s-Santu. Hi se jkollha iben, u inti ssemmih Ġesù, għax hu jsalva l-poplu tiegħu minn dnubiethom." (Mattew 1:21-22)

Il-Kompendju tal-Katekiżmu tal-Knisja Kattolika jgħidilna li: il-Verġni Marija nisslet l-Iben etern fil-ġuf tagħha permezz tal-ħidma tal-Ispirtu s-Santu u mingħajr is-sehem tal-bniedem.

Inti u Marija

Jeħtieġ li n-Nisrani jikkopera mal-grazzja ta’ Alla biex Alla jagħmel l-għeġubijiet ġewwa fih u fl-oħrajn.

Din l-istqarrija ta’ fidi hija opportunità biex niftakru kemm hi kbira wkoll il-qdusija ta’ Marija: din kienet tant miftuħa għall-grazzja ta’ Alla li Alla mhux biss ħadem l-għeġubijiet permezz tagħha, iżda saħansitra hija kkonċepiet permezz tal-ħidma tal-Ispirtu s-Santu, u ġarret f’ġufha lis-Salvatur tad-dinja kollha.

Kemm ngħidu sew fit-talba tar-rużarju, li Marija mhux biss hija miftuħa għal grazzja ta’ Alla, iżda mimlija bil-grazzja!

Ċans biex Tqerr Nhar l-Erbgħa, Lejlet il-Milied

U jien kif se nikkopera mal-grazzja ta’ Alla?

Hekk kif ninsabu fi żmien il-Milied, tajjeb li nieħdu din l-opportunità biex nissaħħu fil-grazzja ta’ Alla, permezz tal-qrar u t-tqarbin, sabiex permezz tagħna Alla ukoll jagħmel għeġubijiet kbar.

Qabel u wara kull quddiesa li tiġi ċċelebrata fil-knejjes tagħna, wieħed ikun jista’ jqerr dnubietu għand saċerdot. Il-Patrijiet Karmelitani qed joffru wkoll opportunità ta’ ġurnata qrar għal kull min jixtieq: Lejlet il-Milied, l-Erbgħa 24 ta’ Diċembru, fis-Santwarju Bażilika tal-Madonna tal-Karmnu, il-Belt Valletta.

Filgħodu:
Mit-8:30 a.m. sa’ Nofsinhar

Waranofsinhar:
Mill-5:30 p.m. sas-6:30 p.m.

Filgħaxija:
Mill-10:30 p.m. sal-11:30 p.m.
(segwita mill-Quddiesa ta’ Nofsillejl)

“Ejjew għandi, intom ilkoll li tinsabu mħabbtin u mtaqqlin, u jiena nserraħkom. Ħudu fuqkom il-madmad tiegħi u tgħallmu minni, għaliex jiena ta’ qalb ħelwa u umli, u intom issibu l-mistrieħ għal ruħkom.” — jgħid il-Mulej Ġesù.

Dan il-Milied, sib il-mistrieħ ta’ ruħek.

Dan il-Milied, erġa’ mur għand Ġesù, permezz ta’ Marija.

Awguri minn qalbna!

Jekk tixtieq tikkuntatjana biex nqabbduk ma’ saċerdot biex titkellem jew tqerr kellimna fuq 79963200 jew fuq WhatsApp