Pietru kien sajjied sempliċi mill-Galilija. Kien bniedem impulsiv, mimli emozzjonijiet, ġeneruż, iżda xi drabi wkoll dgħajjef u mbeżża’. Kultant kien jitkellem qabel ma jaħseb. Kien dak li niżel mid-dgħajsa biex jimxi fuq l-ilma lejn Ġesù, imma meta beda jħares lejn il-maltemp, beda jegħreq. Kien hu li stqarr b’kuraġġ li Ġesù huwa l-Messija, iżda ftit wara ġie mwissi mill-Mulej għax beda jaħseb skont il-bnedmin u mhux skont Alla. Kien hu wkoll li wiegħed li qatt ma kien se jitlaq lil Ġesù, iżda fl-iktar mument diffiċli, ċaħdu tliet darbiet.

Pawlu, min-naħa l-oħra, kien raġel ta’ kultura kbira u edukazzjoni għolja. Fariżew mimli għerf, jaf tajjeb l-Iskrittura u l-Liġi, iżda fil-bidu kien wieħed mill-akbar persekuturi tal-Insara. Hu qatt ma ltaqa’ ma’ Ġesù matul il-ħajja pubblika tiegħu. Il-laqgħa tiegħu mal-Mulej seħħet fit-triq ta’ Damasku, fejn iltaqa’ ma’ Ġesù Rxoxt u ħajtu nbidlet għal kollox.

Pietru u Pawlu kienu differenti fil-karattru, fl-istorja tagħhom, u differenti wkoll fil-missjoni li rċevew. Madankollu llum il-Knisja tfakkarhom flimkien, għax dak li għaqqadhom kien ferm akbar minn dak li kien jifridhom: kienet l-għotja sħiħa tagħhom lil Ġesù Kristu, sal-aħħar.

Il-qdusija

Il-Knisja dejjem fehmet li l-qdusija ma tfissirx li kulħadd ikun l-istess. Alla ma joħloqx kopji; joħloq persuni uniċi. Pietru ma sarx Pawlu, u Pawlu ma sarx Pietru. Il-grazzja ta’ Alla ħadmet f’kull wieħed minnhom skont il-personalità, il-kariżma u l-vokazzjoni tiegħu.

Dan hu messaġġ importanti għalina f’din il-festa tal-lum: Alla ma jsejħilniex biex insiru kopja ta’ ħaddieħor, iżda biex inħallu lil Ġesù jittrasforma dak li aħna.

Il-fidi

L-Evanġelju tal-lum jibda b’mistoqsija li tibqa’ tidwi f’kull żmien: “Min jgħidu n-nies li hu Bin il-Bniedem?” (Mt 16:13) Id-dixxipli jirrakkuntaw dak li kienu qed jgħidu n-nies: Ġwanni l-Battista, Elija, Ġeremija, jew wieħed mill-profeti. Imma mbagħad Ġesù jagħmel il-mistoqsija deċiżiva: “Imma intom, min tgħidu li jien?” (Mt 16:15)

Din hija l-mistoqsija li fuqha tinbena l-ħajja Nisranija kollha. Il-fidi f’Ġesù mhijiex sempliċi tradizzjoni jew kultura. Il-fidi tibda minn relazzjoni personali ma’ Ġesù Kristu u mill-mod kif kull wieħed u waħda minna nwieġbu għal din il-mistoqsija.

Pietru jwieġeb: “Int il-Messija, Bin Alla l-Ħaj” (Mt 16:16). Din hija l-pedament tal-fidi tagħna. Imma Ġesù jgħidlu wkoll xi ħaġa importanti ħafna: “Mhux bniedem tad-demm u l-laħam uriek dan, imma Missieri li hu fis-smewwiet” (Mt 16:17). Il-fidi hija dejjem rigal qabel ma hi tweġiba tagħna. Alla dejjem jieħu l-ewwel pass. Hu jiftaħ qalbna biex inkunu nistgħu nagħrfu lil Ġesù, u nilqgħuh.

Id-dgħufija

Żgur li tolqotna ħafna fl-Evanġelju kif Ġesù jagħżel lil Pietru minkejja li jaf sew min hu. Jaf li se jiċħdu, jaf li se jaqa’, jaf il-biżgħat, u d-dgħufijiet tiegħu. U madankollu jgħidlu: “Int Pietru, u fuq din il-blata jiena nibni l-Knisja tiegħi” (Mt 16:18).

Dan ifisser li Alla ma jistenniex li nsiru perfetti qabel jafdalna missjoni. Kieku kien hekk, qatt ma kien ikun hemm appostli. Il-Knisja qatt ma nbniet fuq nies perfetti. Inbniet dejjem fuq midinbin li ħallew il-ħniena ta’ Alla tbiddilhom.

L-awtorità ta’ Pietru ma kinitx mibnija fuq il-perfezzjoni tiegħu, iżda fuq il-grazzja ta’ Ġesù. Dan jibqa’ minnu wkoll illum. Il-Knisja hija qaddisa mhux għax il-membri tagħha huma perfetti, iżda għax Ġesù hu qaddis. Aħna lkoll nibqgħu bnedmin li kuljum għandna bżonn il-konverżjoni.

Il-passat

Jekk Pietru jfakkarna li d-dgħufija mhix l-aħħar kelma, Pawlu jfakkarna li l-passat qatt ma huwa ostaklu għall-ħniena ta’ Alla. Pawlu kien jippersegwita lill-Insara. Kien approva l-qtil ta’ Stiefnu, bħalma naqraw fl-Atti tal-Appostli. Kien jemmen li qed jaqdi lil Alla waqt li kien qed jiġġieled kontra Ġesù.

U madankollu Ġesù ma qerdux. Bidlu. Min seta’ jimmaġina li dak li kien l-akbar persekutur tal-Knisja kien se jsir l-akbar missjunarju tagħha? Il-grazzja ta’ Alla tikteb stejjer li l-bniedem qatt ma kien ikun kapaċi jivvinta.

Pawlu qatt ma nesa minn fejn ġie. Kien jaf li dak kollu li sar kien frott il-ħniena ta’ Alla. Proprju għalhekk qatta’ l-bqija ta’ ħajtu jħabbar l-Evanġelju b’ħeġġa straordinarja.

Il-fedeltà

Fl-ewwel qari naraw lil Pietru fil-ħabs. Kollox kien jidher mitmum, bla tama, għax Erodi ddeċieda li joqtlu. U madankollu, waqt li Pietru rieqed, il-Knisja kollha qed titlob għalih. Alla jibgħat l-anġlu tiegħu. Il-ktajjen jaqgħu, il-bibien jinfetħu, u Pietru joħroġ ħieles.

Dan ma jfissirx li Alla dejjem ineħħi t-tbatija. Fil-fatt, aktar tard, Pietru jmut martri, u dan hu li niċċelebraw illum. Imma l-messaġġ hu wieħed ċar: ebda qawwa tad-dinja ma tista’ żżomm l-Evanġelju marbut bil-ktajjen. Is-Saltna ta’ Alla tibqa’ timxi ‘l quddiem, anki meta kollox jidher mitluf.

Pawlu jesprimi l-istess ċertezza fit-Tieni Qari, fit-Tieni Ittra lil Timotju, meta jgħid: “Tqabbadt it-taqbida t-tajba, temmejt il-ġirja, ħarist il-fidi” (2 Tim 4:7).

Ma jgħidx li għex ħajja komda, jew li evita t-tbatija. Lanqas li dejjem kellu suċċess. Jgħid biss li baqa’ fidil, u dan hu li niċċelebraw illum bil-martirju tiegħu. Il-ħajja Nisranija ma titkejjilx mill-kumdità, iżda mill-fedeltà lejn Ġesù.

Il-missjoni

Lil Pietru, Ġesù jafdalu missjoni partikulari ta’ tmexxija u għaqda. Lil Pawlu jafdalu missjoni ta’ evanġelizzatur. Pietru u Pawlu jfakkruna li aħna l-imgħammdin, ilkoll għandna missjoni partikulari. Xi wħud huma msejħin biex imexxu, oħrajn biex jgħallmu. Xi wħud biex jevanġelizzaw bil-kelma, oħrajn biex jixhdu bl-imħabba siekta tal-ħajja ta’ kuljum. Kull vokazzjoni hija importanti. Kull servizz jibni l-Knisja. Il-mistoqsija mhijiex: “X’qed jagħmlu l-oħrajn?”, imma: “X’qed jitlob minni Ġesù llum?”

Il-kuruna

Fl-aħħar ta’ ħajtu Pawlu jitkellem b’serenità kbira: “Hemm imħejjija għalija l-kuruna tal-ġustizzja” (2 Tim 4:8). Ma jitkellimx b’arroganza, jitkellem bit-tama. Jaf li dak li se jiġġudikah huwa wkoll is-Salvatur tiegħu. Jaf li kull sagrifiċċju magħmul għall-imħabba ta’ Ġesù qatt ma jintilef.

Din kienet it-tama li sostniet lil Pietru fil-martirju tiegħu. Din kienet it-tama li tat il-qawwa lil Pawlu quddiem il-mewt. U din hija wkoll it-tama tagħna. Id-destin tagħna mhuwiex il-mewt. Id-destin tagħna huwa l-ħajja għal dejjem ma’ Ġesù.

Nitolbu llum lill-Mulej, f’din il-festa hekk kbira, biex jagħtina l-imħabba ġeneruża ta’ Pietru, il-ħeġġa missjunarja ta’ Pawlu, l-umiltà li nqumu wara kull waqgħa, il-perseveranza fit-tiġrib, u l-fidi u l-fedeltà biex, bil-ħajja kollha tagħna, inkomplu nistqarru: “Int il-Messija, Bin Alla l-Ħaj”.

✠ Joseph Galea-Curmi   
    Isqof Awżiljarju

Kien l-ewwel jum tal-ġimgħa, filgħodu kmieni kif kien għadu d-dlam, u Marija ta’ Magdala ġiet ħdejn il-qabar u rat il-blata mneħħija mill-qabar. Għalhekk telqet tiġri għand Xmun Pietru u għand id-dixxiplu l-ieħor li kien iħobb Ġesù, u qaltilhom: “Qalgħu lill-Mulej mill-qabar, u ma nafux fejn qegħduh!”.

Pietru u d-dixxiplu l-ieħor ħarġu u ġew ħdejn il-qabar. It-tnejn ġrew flimkien, imma d-dixxiplu l-ieħor ħaffef aktar minn Pietru u laħaq qablu ħdejn il-qabar. Tbaxxa, u ra l-faxex tal-għażel imqiegħda hemm, iżda ma daħalx. Imbagħad wasal warajh Xmun Pietru, daħal fil-qabar, u ra l-faxex tal-għażel imqiegħda hemm, u l-maktur li kien madwar rasu; dan ma kienx mal-faxex, imma mitwi u mqiegħed f’post għalih. Imbagħad id-dixxiplu l-ieħor, li kien wasal l-ewwel ħdejn il-qabar, daħal hu wkoll, ra, u emmen.

Sa dakinhar kienu għadhom ma fehmux l-Iskrittura li tgħid li kellu jqum mill-imwiet. Ġw 20:1-9

i. Kien l-ewwel jum tal-ġimgħa, filgħodu kmieni kif kien għadu d-dlam, u Marija ta’ Magdala ġiet ħdejn il-qabar u rat il-blata mneħħija mill-qabar.

Fl-ewwel jum
meta Alla qal “Ħa jkun id-dawl” u
“fired id-dawl mid-dlam” (Ġenesi 1, 2-3)

Marija ta’ Magdala
kif kien għadu d-dlam
tilmaħ il-qabar miftuħ:

hemm ħolqien ġdid, id-dawl għeleb lid-dlam,
u f’qalbha jiċċaqlaq xi ħaġa
li l-moħħ għadu ‘l bogħod biex jaħkem.

Irrifletti:

• Fejn hemm dawl ġdid ifeġġ f’ħajtek?

ii. Għalhekk telqet tiġri għand Xmun Pietru u għand id-dixxiplu l-ieħor li kien iħobb Ġesù, u qaltilhom: “Qalgħu lill-Mulej mill-qabar, u ma nafux fejn qegħduh!”.

“Qalgħu lill-Mulej mill-qabar”!
Tinftiehem bħala serqa
il-fedeltà tal-Missier.

“U ma nafux fejn qegħduh!”
U lanqas se nsiru nafu
U lanqas hemm bżonn insiru nafu.

Issa l-Mulej imexxi l-istorja
mhux inqiegħduh fejn jidhrilna aħna!

Però ibqa’ fittxu:
kull darba ħallih jieħdok lil hinn mill-qabar.

Irrifletti:

• Ġesù il-Mulej tiegħek? Tħallih imexxik?

iii. Imbagħad wasal warajh Xmun Pietru, daħal fil-qabar, u ra l-faxex tal-għażel imqiegħda hemm, u l-maktur li kien madwar rasu; dan ma kienx mal-faxex, imma mitwi u mqiegħed f’post għalih. Imbagħad id-dixxiplu l-ieħor, li kien wasal l-ewwel ħdejn il-qabar, daħal hu wkoll, ra, u emmen.

Għall-ewwel naraw il-fatti (v. 1: blepo - βλέπω):
jistgħu jidhru koroh jew newtrali!

Fit-tieni mument, ma’ Pietru, nibdew nirriflettu (v. 6: theoreo - θεωρέω):
hemm ċertu ordni, donnu hemm xi ħaġa aktar!

U fl-aħħar, mad-dixxiplu l-maħbub, naraw fil-fond (v. 8: horao - ὁράω):
U nemmnu! U l-perspettiva tal-ħajja tinbidel ta’ taħt fuq!

Jekk dak li għamel il-ġid, dak li qatluh, huwa ħaj, irxuxtat,
mela fuq ħajtu jagħmel sens li nfassal tiegħi.

Irrifletti:

• Ieqaf ftit bil-memorja tax-xemx tielgħa? Ħalli lil Ġesù Rxoxt idawwal lil ħajtek.

3. Missierna

Dawn ir-riflessjonijiet u aktar tista’ ssibhom fuq il-Paġna ta’ Facebook tal-Knisja ta’ Sant’ Anna taż-Żebbiegħ, l-Imġarr.

Inħeġġuk tagħfas Follow.

F’dak iż-żmien, ħut Lazzru bagħtu jgħidu lil Ġesù: “Mulej, ara, ħabibek marid”. Meta sama’ l-aħbar Ġesù qal: “Din m’hijiex marda tal-mewt, iżda hi għall-glorja ta’ Alla, biex biha tingħata glorja lill-Iben ta’ Alla”. Ġesù kien iħobbhom lil Marta u lil oħtha u lil Lazzru. Meta sama’ li dan marad, baqa’ jumejn oħra fejn kien, u mbagħad qal lid-dixxipli: “Ejjew nerġgħu mmorru l-Lhudija”.

Meta wasal, Ġesù sab li Lazzru kien ġa ilu erbat ijiem fil-qabar. Kif, mela, semgħet li kien ġej Ġesù, Marta ħarġet tilqgħu, iżda Marija baqgħet id-dar. Marta qalet lil Ġesù: “Mulej, kieku kont hawn, ħija ma kienx imut. Imma wkoll issa, jiena naf li kull ma int titlob lil Alla, Alla jagħtihulek”. Ġesù qalilha: “Ħuk jerġa’ jqum!”. Qaltlu Marta: “Jiena naf li jerġa’ jqum, fil-qawmien mill-imwiet fl-aħħar jum”. Qalilha Ġesù: “Jiena hu l-qawmien u l-ħajja. Kull min jemmen fija, ukoll jekk imut, jgħix; u kull min jgħix u jemmen ija, dan ma jmut qatt. Temmnu inti dan?”. Weġbitu: “Iva Mulej, jiena nemmen li inti l-Messija, l-Iben ta’ Alla, dak li ġie fid-dinja”.

Ġesù ħass ruħu mqanqal u tħawwad ħafna. “Fejn qegħedtuh?” staqsiehom. Huma weġbuh: “Mulej, ejja u ara”. U Ġesù beka. Għalhekk il-Lhud qalu: “Ara kemm kien iħobbu!”. Iżda xi wħud minnhom qalu: “Ma setax dan il-bniedem, li fetaħ għajnejn l-agħma, jagħmel ukoll li dan ma jmutx?”.

Ġesù ħass ruħu mqanqal għal darb’oħra u resaq lejn il-qabar. Dan kien għar magħluq bi blata fuqu. Ġesù qal: “Neħħu l-blata”. Marta, oħt il-mejjet, qaltlu: “Mulej issa beda jrejjaħ; ġa ilu erbat ijiem mejjet”. Qalilha Ġesù: “Ma għedtlekx li jekk inti temmen, tara l-glorja ta’ Alla?”. Imbagħad neħħew il-blata. Ġesù rafa’ għajnejh ’il fuq u qal: “Missier, irroddlok ħajr li smajtni. Kont naf li inti dejjem tismagħni, imma għidt dan minħabba n-nies li hawn madwari, biex huma jemmnu li inti bgħattni”. Kif qal hekk, għajjat b’leħen għoli: “Lazzru, oħroġ!”. U dak li kien mejjet ħareġ, b’idejh u riġlejh infaxxati u b’maktur ma’ wiċċu. Ġesù qalilhom: “Ħollulu l-faxex u ħalluh imur”.

Ħafna mil-Lhud, li kienu ġew għand Marija u raw dak li għamel Ġesù, emmnu fih. Ġw 11, 3-7.17.20-27.33b-45

i. Ġesù ħass ruħu mqanqal għal darb’oħra u resaq lejn il-qabar. Dan kien għar magħluq bi blata fuqu. Ġesù qal: “Neħħu l-blata”. Marta, oħt il-mejjet, qaltlu: “Mulej issa beda jrejjaħ; ġa ilu erbat ijiem mejjet”. Qalilha Ġesù: “Ma għedtlekx li jekk inti temmen, tara l-glorja ta’ Alla?”. Imbagħad neħħew il-blata.

Ġesù mqanqal għal darb’oħra
quddiem ħabibu Lazzru mejjet
quddiem il-kruha tal-mewt
quddiem dak li jidher midfun għal dejjem.

Ġesù jqanqal
jersaq qrib ir-realtà iebsa
iċaqlaq iċ-ċertezzi li jgħidulek “ma hemmx x’tagħmel aktar”
jiftaħ il-fidi għas-sorpriżi t’Alla.

Irrifletti:

• Ma liema ġebla tissielet?

ii. Ġesù rafa’ għajnejh ’il fuq u qal: “Missier, irroddlok ħajr li smajtni. Kont naf li inti dejjem tismagħni, imma għidt dan minħabba n-nies li hawn madwari, biex huma jemmnu li inti bgħattni”. Kif qal hekk, għajjat b’leħen għoli: “Lazzru, oħroġ!”.

Saqajh mal-art,
quddiem il-qabar, qrib qlub miksura

għajnejh ‘il fuq
jara lil hinn, bi gratitudni lejn il-Missier li jidher assenti

b’vuċi qawwija
li tkellem l-impossibbli, lil min diġà mejjet: “Lazzru oħroġ!”

L-ebda ġebla, disfatta, falliment jew ħtija ma jżommu lil Alla lura.

Irrifletti:

• Xi jfissru għalik dawn il-kliem indirizzati lilek? “Lazzru , oħroġ!”

iii. U dak li kien mejjet ħareġ, b’idejh u riġlejh infaxxati u b’maktur ma’ wiċċu. Ġesù qalilhom: “Ħollulu l-faxex u ħalluh imur”.

Lil dawk b’qalbhom imnikkta
għat-telfa u l-firda
jissorprendihom mill-ġdid:
“issa tifgawhx” – il-ħajja tikber fil-libertà -
“Hollulu l-faxedx u ħalluh imur”.

Irrifletti:

• Xi tfisser għalik li bl-imħabba tiegħek tkabbar il-libertà f’ħaddieħor?

3. Missierna

Dawn ir-riflessjonijiet u aktar tista’ ssibhom fuq il-Paġna ta’ Facebook tal-Knisja ta’ Sant’ Anna taż-Żebbiegħ, l-Imġarr.

Inħeġġuk tagħfas Follow.

F’dak iż-żmien, kif kien għaddej, Ġesù lemaħ raġel agħma minn twelidu; beżaq fl-art, għamel minnu qisu tajn, u dilek bih għajnejn ir-raġel agħma u qallu: “Mur inħasel fil-menqgħa ta’ Silwam”. Din tfisser “il-Mibgħut”. Mela dak mar, inħasel u ġie jara. Il-ġirien u dawk li s-soltu kienu jarawh, għax hu kien tallab, qalu: “Dan mhuwiex dak li kien joqgħod bilqiegħda jittallab?”. Xi wħud qalu: “Iva, hu”. Oħrajn qalu: “Le, imma jixbhu”. Iżda hu qalilhom: “Jiena hu”.

Lil dan il-bniedem li fl-imgħoddi kien agħma ħaduh għand il-Fariżej. Issa dakinhar li Ġesù għamel it-tajn u fetaħ għajnejn l-agħma nzerta kien is-Sibt. Il-Fariżej ukoll staqsew mill-ġdid lill-agħma kif sar jara. U hu qalilhom: “Qegħedli ftit tajn fuq għajnejja, mort ninħasel, u issa qiegħed nara”. Xi wħud mill-Fariżej qalu: “Dan il-bniedem mhuwiex ġej mingħand Alla, għax ma jħarisx is-Sibt”. Iżda oħrajn qalu: “Kif jista’ wieħed midneb jagħmel sinjali bħal dawn?”. U ma qablux bejniethom.

U reġgħu qalu lill-agħma: “Int x’jidhirlek minnu, issa li fetaħlek għajnejk?”. Qalilhom: “Dak profeta”. Imbagħad qabżu u qalulu: “Int se tgħallem lilna, int li twelidt dnubiet waħdek”. U keċċewh ’il barra.

Ġesù sama’ li keċċewh ’il barra; sabu u qallu: “Temmen inti f’Bin il-bniedem?”. Dak wieġeb u qallu: “Min hu, Mulej, biex nemmen fih?”. Qallu Ġesù: “Mhux biss rajtu, imma huwa dak stess li qiegħed ikellmek”. Qallu: “Nemmen, Mulej!”. U nxteħet għarkupptejh quddiemu. Ġw 9:1,6-9,13-17,34-38

i. Kif kien għaddej, Ġesù lemaħ raġel agħma minn twelidu; beżaq fl-art, għamel minnu qisu tajn, u dilek bih għajnejn ir-raġel agħma u qallu: “Mur inħasel fil-menqgħa ta’ Silwam”. Din tfisser “il-Mibgħut”. Mela dak mar, inħasel u ġie jara.

Faċli toqgħod tiddiskuti ta’ min hu t-tort,
f’min se twaħħal,
x’ġudizzju se tagħti:
l-agħma jibqa’ ma jarax.

L-agħma jibda jara
wara li Ġesù lemħu, iltaqa’ miegħu
wara li Ġesù ħa lilu u r-realtà bis-serjetà – diliklu għajnjeh bit-tajn -
wara li stiednu jara kollox mill-perspettiva t’Alla –
jinħasel fil-Mibgħut.

Irrifletti:

• Fejn mistieden toqrob lejn it-tbatija tal-oħrajn flok tiġġudikaha mill-bogħod?

ii. Il-Fariżej ukoll staqsew mill-ġdid lill-agħma kif sar jara. U hu qalilhom: “Qegħedli ftit tajn fuq għajnejja, mort ninħasel, u issa qiegħed nara”. Xi wħud mill-Fariżej qalu: “Dan il-bniedem mhuwiex ġej mingħand Alla, għax ma jħarisx is-Sibt”. Iżda oħrajn qalu: “Kif jista’ wieħed midneb jagħmel sinjali bħal dawn?”. U ma qablux bejniethom.

U reġgħu qalu lill-agħma: “Int x’jidhirlek minnu, issa li fetaħlek għajnejk?”. Qalilhom: “Dak profeta”. Imbagħad qabżu u qalulu: “Int se tgħallem lilna, int li twelidt dnubiet waħdek”. U keċċewh ’il barra.

Kif inhi li minn persuni li jsaqsu, li jfittxu,
issa waslu biex ikeċċuh ‘il barra.

Kif inhi li qegħdin nużaw ir-reliġjon
biex noħolqu gwerra, biex neliminaw l-innoċenti?

Kif inhi li filli qed jesploraw perspettiva differenti (ma qablux bejniethom)
u filli jaqblu kollha fuq l-aktar veduti estremisti?

Irrifletti:

• Fejn qed teħel ma’ idea li għandek u ma tinfetaħx għal perspettiva ġdida? X’inhi l-istedina t’Alla f’ħajtek bħalissa? Min qed ibati meta tingħalaq għaliha?

iii. Ġesù sama’ li keċċewh ’il barra; sabu u qallu: “Temmen inti f’Bin il-bniedem?”. Dak wieġeb u qallu: “Min hu, Mulej, biex nemmen fih?”. Qallu Ġesù: “Mhux biss rajtu, imma huwa dak stess li qiegħed ikellmek”. Qallu: “Nemmen, Mulej!”. U nxteħet għarkupptejh quddiemu.

L-ideat f’moħħi,
jidhru kemm jidhru tajbin,
faċli jsiru għamad biex ma narax ir-realtà,
faċli jsiru arma li joqtlu r-relazzjoni.

Temmen inti f’Bin il-bniedem?
Hemm relazzjoni bażika ta’ fiduċja f’ħajtek?
Dak li miftuħ totalment għall-Etern, għall-Missier, jista’ jiftaħlek perspettiva ġdida?
Dak li miftuħ kontinwament għar-realtà – f’kompassjoni għal min iġorr it-tbatija –
jista’ jiftaħlek għajnejk għal dawk li aħna aktar komdi nħalluhom fl-agħma?

Irrifletti:

• Ieqaf ftit mal-kliem “Nemmen, Mulej!”. Agħżel ġest biex tesprimi l-fiduċja f’Ġesù.

3. Missierna

Dawn ir-riflessjonijiet u aktar tista’ ssibhom fuq il-Paġna ta’ Facebook tal-Knisja ta’ Sant’ Anna taż-Żebbiegħ, l-Imġarr.

Inħeġġuk tagħfas Follow.

Niftħu qalbna għall-Kelma t’Alla

F’dak iż-żmien, Ġesù ġie f’belt tas-Samarija, jisimha Sikar, qrib il-biċċa art li Ġakobb kien ta lil ibnu Ġużeppi, fejn kien hemm ukoll il-bir ta’ Ġakobb. Kien għall-ħabta tas-sitt siegħa, u Ġesù, għajjien kif kien mill-mixi, qagħad bilqiegħda ħdejn il-bir.

U ġiet mara mis-Samarija timla l-ilma. Ġesù qalilha: “Agħtini nixrob”. Id-dixxipli tiegħu kienu marru l-belt jixtru x’jieklu. Il-mara mis-Samarija qaltlu: “Kif! Inti Lhudi u titlob lili, Samaritana, biex nagħtik tixrob?”. Qaltlu hekk għax il-Lhud ma jitħalltux mas-Samaritani. Ġesù weġibha: “Kieku kont taf id-don ta’ Alla u min hu dak li qiegħed jgħidlek: ‘Agħtini nixrob’, kieku int kont titolbu, u hu kien jagħtik ilma ħaj”. Qaltlu l-mara: “Sinjur, mnejn se ġġib l-ilma ħaj jekk anqas biex timla ma għandek u l-bir huwa fond? Jaqaw int aqwa minn missierna Ġakobb li tana dan il-bir, li minnu xorob hu u wliedu u l-imrieħel tiegħu?”. Weġibha Ġesù: “Kull min jixrob minn dan l-ilma jerġa’ jagħtih l-għatx; imma min jixrob mill-ilma li nagħtih jien qatt iżjed ma jkun bil-għatx. L-ilma li nagħtih jien isir fih għajn tal-ilma li jwassal sal-ħajja ta’ dejjem”. Qaltlu l-mara: “Agħtini dan l-ilma, Sinjur, biex ma jaqbadnix l-għatx, u anqas ma noqgħod ġejja u sejra hawn nimla l-ilma. Int profeta, Sinjur, milli qiegħda nara. Missirijietna kienu jaduraw lil Alla fuq din il-muntanja; imma intom tgħidu li l-post fejn wieħed għandu jadura lil Alla jinsab f’Ġerusalemm”. Qalilha Ġesù: “Emminni, mara, jiġi żmien meta mhux fuq din il-muntanja taduraw lill-Missier, anqas f’Ġerusalemm. Intom taduraw lil dak li ma tafux; aħna naduraw lil dak li nafu, għax is-salvazzjoni ġejja mil-Lhud. Imma tiġi siegħa, anzi issa hi, meta dawk li tassew jaduraw jibdew jaduraw lill-Missier fl-ispirtu u fil-verità. Għax il-Missier ukoll, nies bħal dawn ifittex li jadurawh. Alla huwa spirtu, u dawk li jadurawh għandhom jadurawh fl-ispirtu u fil-verità”. Qaltlu l-mara: “Jiena naf li ġej il-Messija – dak li jgħidulu Kristu. Meta jiġi hu, kollox iħabbrilna”. Qalilha Ġesù: “Jiena hu, li qiegħed nitkellem miegħek”. Kien hemm ħafna Samaritani minn dik il-belt li emmnu f’Ġesù fuq ix-xhieda li tathom dik il-mara tant, li meta ġew ħdejh, bdew jitolbuh biex jibqa’ magħhom, u hu qagħad hemm jumejn. Imbagħad ħafna oħrajn emmnu minħabba kliemu, u lill-mara qalulha: “Issa mhux għax għedtilna int qegħdin nemmnu, imma għax aħna wkoll smajnieh, u sirna nafu li dan tassew hu s-salvatur tad-dinja”.

Ġw 4:5-15,19b-26,39a,40-42

i. Ġesù ġie f’belt tas-Samarija, jisimha Sikar, qrib il-biċċa art li Ġakobb kien ta lil ibnu Ġużeppi, fejn kien hemm ukoll il-bir ta’ Ġakobb. Kien għall-ħabta tas-sitt siegħa, u Ġesù, għajjien kif kien mill-mixi, qagħad bilqiegħda ħdejn il-bir.

Ġesù, għajjien kif kien mill-mixi
jieqaf f’Sikar, qrib il-bir ta’ Ġakobb
iġorr fuqu l-għejja ta’ Ġakobb,
ta’ żmien twil jaħrab minn ħuħ Esau (Ġen 33, 18-20)

iġorr fuqu l-għejja tagħna,
ta’ relazzjonijiet fraġli,
mixtieqa għal rabtiet li jagħtu l-ħajja (Ġożwe 24).

Irrifletti:

• Liema għejja ġġorr?

Ġesù weġibha: “Kieku kont taf id-don ta’ Alla u min hu dak li qiegħed jgħidlek: ‘Agħtini nixrob’, kieku int kont titolbu, u hu kien jagħtik ilma ħaj”.

Bħas-Samaritana, għaddej!
B’xi mod miexi, ir-rutina għaddejja,
il-barmil f’idejja!

Imma fil-fond
hemm għatx, hemm tfittxija.

Għalkemm Ġesù bla barmil,
ftit, ftit, ilaqqagħna mal-għatx tagħna
kif ukoll mal-għajn tal-ħajja.

Irrifletti:

• Kien hemm xi persuna, li għalkemm tidher fraġli, fetħitlek triq għall-ħajja?

iii. Imbagħad ħafna oħrajn emmnu minħabba kliemu, u lill-mara qalulha: “Issa mhux għax għedtilna int qegħdin nemmnu, imma għax aħna wkoll smajnieh, u sirna nafu li dan tassew hu s-salvatur tad-dinja”.

Hemm laqgħat li jċaqilqu fik xi ħaġa,
li jiżirgħu fik fiduċja biex terġa toħroġ,
isserrep fis-sħana biex taqta’ l-għatx li kien moħbi.

Imma hemm ukoll laqgħa unika
li fiha qalbek tistrieħ:
fejn tisma’ u tiltaqa’ mas-salvatur tad-dinja.

Irrifletti:

• Ieqaf ftit fil-presenza ta’ Ġesù, is-salvatur tad-dinja. Itolbu l-ilma.

3. Itlob il-Missierna

Dawn ir-riflessjonijiet u aktar tista’ ssibhom fuq il-Paġna ta’ Facebook tal-Knisja ta’ Sant’ Anna taż-Żebbiegħ, l-Imġarr.

Inħeġġuk tagħfas Follow.